Лукашэнка — Салану: торг тут недарэчы!
Падтэкст такі: не накідайце нам свае каштоўнасныя пункцікі, давайце ладзіць «прагматычны дыялог»! Піша ў сваім блогу Аляксандар Класкоўскі.
У развіцці дачыненняў між Беларуссю і ЕС не мусіць быць гандлю. БЕЛТА акцэнтуе ўвагу менавіта на гэтым месіджы Лукашэнкі Салану. Падтэкст такі: не накідайце нам свае каштоўнасныя пункцікі, давайце кантактаваць прагматычна!
Другая тэза, што прагучала з вуснаў гаспадара на сустрэчы 19 лютага: трэба выключыць з дыялогу пасярэднікаў, асабліва нядобразычлівых. Тут падтэкст таксама празрысты: хай не лезе апазіцыя! Гэтую тэму днямі Лукашэнка разгарнуў у Магілёве. Апазіцыя намаляваная купкай крымінальнікаў. Ну як можна такіх пускаць за стол высокай палітыкі?
Зразумела, блізкія да ўлады агенцтвы цытуюць адзін бок, высокі госць пэўна ж выдаў правільныя тэзы наконт важнасці дэмакратыі, вяршэнства закону ды правоў чалавека.
Але выглядае на тое, што
дэ-факта Брусель зараз ідзе ў рэчышчы накінутага Мінскам “прагматычнага дыялогу”.
Пэцканне ж палітычных апанентаў брудам — гэта не толькі інерцыя старой кружэлкі. Сёння гэта звышзадача. Бо калі прызнаць іх правы, то,
сказаўшы “а”, трэба казаць і “б”. Трэба прызнаваць, што існая сістэма абсалютна не прыстасавана для канкурэнтнай палітыкі і яе трэба не тое што апгрэйдзіць, а цалкам перарабляць.
Ага, разагналіся!
Да апазіцыі ж, што піша “цялегі” Еўропе, тутэйшае начальства, мусіць, без разбору прылічвае ўсіх, хто мае адрозны погляд на развіццё Беларусі. Не выключана, што ў разрад “цялегі” трапіў і прапанаваны экспертамі Беларускага інстытута стратэгічных даследаванняў супольна з офісам “За дэмакратычную Беларусь” разумны план пакрокавага ангажавання краіны ў еўрапейскі кантэкст.
Іншая рэч, што і Брусель пакуль што не надта гарыць жаданнем неяк фармалізаваць стратэгію на беларускім кірунку. Пытанне аб “дарожнай карце” так і павісла ў паветры.
Еўрачыноўнікам зручней мець, як яны кажуць, “гнуткі інструмент”. Але ж каб пры такой методзе не загнуліся найперш хітрыя спадзевы Бруселя ўзяць сваё спакваля! Акурат сваё возьме рэжым, нічога не мяняючы ў краіне.
«Муж сышоў з Сіплым і Малым». Імаверна, пад Краматорскам украінцы адным махам убайдосілі трох беларускіх наёмнікаў19
Каментары