Міністэрства юстыцыі Беларусі адмовіла ў рэгістрацыі праваабарончаму грамадскаму аб’яднанню «Наша Вясна».
Як паведаміў БелаПАН адзін з ініцыятараў стварэння арганізацыі Валянцін Стэфановіч, ліст з адмовай быў атрыманы 3 сакавіка. «Гэта тыповая адмова, заснаваная на нейкіх незразумелых дапушчэннях, распісаная на чатырох старонках», — сказаў ён.
У прыватнасці, паводле слоў Стэфановіча, Мінюст ставіць пад сумнеў факт правядзення ўстаноўчага сходу арганізацыі, паколькі памяшканне офіса Аб’яднанай грамадзянскай партыі, дзе 18 студзеня ён праходзіў, вельмі невялікае. «Апрача таго, Мінюст лічыць, што квітанцыю аб аплаце дзяржпошліны можна не браць пад увагу, паколькі ў ёй не названа арганізацыя, за рэгістрацыю якой падаецца квітанцыя», — зазначыў В.Стэфановіч.
Паводле слоў праваабаронцы, да заснавальнікаў арганізацыі прад’яўляюцца старыя прэтэнзіі: тое, што некаторыя з іх раней прыцягваліся да адміністрацыйнай адказнасці за розныя правапарушэнні — удзел у несанкцыянаваных акцыях, распаўсюджанне выданняў без выхадных звестак і іншае.
«Безумоўна, мы будзем абскарджваць гэтую адмову ў Вярхоўным судзе, потым — у старшыні Вярхоўнага суда, потым — у Камісіі ААН па правах чалавека, — заявіў Стэфановіч. — Прычым мы будзем патрабаваць, каб нашу скаргу аб’ядналі з аналагічнай скаргай 2007 года. Персанальна я лічу, што ў дачыненні да непасрэдна мяне парушаюцца канкрэтныя мае правы: права на свабоду сходаў і аб’яднанняў, прычым парушаюцца сістэматычна».
Стэфановіч нагадаў, што 24 чэрвеня 2007 года Камітэт па правах чалавека ААН зрабіў выснову, што сваімі дзеяннямі па ліквідацыі ГА «Вясна» беларуская дзяржава парушыла пункт 1 артыкула 22 Міжнароднага пакта аб грамадзянскіх і палітычных правах. «Аднак Міністэрства юстыцыі, а затым і Вярхоўны суд Беларусі праігнаравалі рашэнне Камітэта па правах чалавека ААН, і спроба зарэгістраваць грамадскае аб’яднанне «Вясна» ў жніўні 2007 года не прынесла вынікаў», — дадаў праваабаронца.
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў15
Каментары