Пракаповіч прапаведуе пераход на расійскія рублі ва ўзаемаразліках
Кіраўнік Нацбанку Беларусі заявіў пра курс на адмову ад даляраў ва ўзаемаразліках.
Кіраўнік Нацбанку Беларусі заявіў пра курс на адмову ад даляраў ва ўзаемаразліках.
Перамоўны працэс з Расійскай Федэрацыяй па выкарыстанні ва ўзаемаразліках у якасці рэзервовай валюты расійскага рубля блізкі да завяршэння, заявіў старшыня праўлення Нацыянальнага банку Пётр Пракаповіч 16 сакавіка ў ходзе дакладу Аляксандру Лукашэнку. Паводле яго слоў, аналагічныя перамовы вядуцца і з Украінай, паведамляе прэс‑служба кіраўніка дзяржавы.
У Нацбанку лічаць, што адной з прычын крызісу сусветнай эканомікі стала дамінаванне адной рэзервовай валюты — долара ЗША. «Мы зрабілі выснову, што павінны максімальна стымуляваць развіццё двухбаковых і шматбаковых адносінаў за кошт разлікаў у нацыянальных валютах, за кошт стымулявання прымянення рэзервовых рэгіянальных валют іншых краін, каб тым самым мінімізаваць страты ад гегемоніі адной валюты», — сказаў старшыня праўлення Нацбанка.
Паводле яго слоў, у гэтым кірунку ўжо паспяхова зроблены першыя крокі. Так, зазначыў П.Пракаповіч, Беларусь заключыла пагадненне з Кітаем аб фінансавай здзелцы, па якой атрымала магчымасць доступу да кітайскіх рэсурсаў у аб’ёме каля 3 млрд долараў «на выключна выгадных для сябе ўмовах». Гэта з’яўляецца асновай для актывізацыі гандлёва‑эканамічных адносінаў паміж дзвюма краінамі, а таксама дазволіць найбліжэйшым часам нарасціць двухбаковы тавараабарот не менш чым у пяць разоў, сказаў ён. «Гэта той стымул, які на 10—15 гадоў наперад дае фінансавае забеспячэнне для развіцця нашай эканомікі», — зазначыў Пётр Пракаповіч.
Такім чынам, паводле яго слоў, Беларусь плануе ў разліках з усімі асноўнымі гандлёвымі партнёрамі перайсці на выкарыстанне рэзервовых рэгіянальных валют. У перспектыве гэта дазволіць знізіць залежнасць краіны ад адной валюты, у прыватнасці долара.
Паводле слоў П.Пракаповіча, меры, што прымаюцца, — гэта адзін са спосабаў мінімізацыі наступстваў сусветнага фінансава‑эканамічнага крызісу.
Цяпер чытаюць
Максім Знак: Мы з Ціханоўскай зайшлі падаваць скаргу ў кабінет Ярмошынай — але Ярмошынай там не было57
Каментары