Авіярэйс з Мінска ў Мюнхен адклалі на дзень. Пасажырам давялося начаваць у аэрапорце
Пасажыры, якія меліся ляцець рэйсам Мюнхен—Мінск 10 лютага, абурыліся тым, што авіакампанія «Белавія» не прадаставіла ўмоваў для камфортнага чакання.
У «Нашу Ніву» звярнуўся чытач Юрый Таболін. Ён расказаў, што ў панядзелак праз адмену рэйса некалькі дзясяткаў беларусаў захраслі ў аэрапорце Мюнхена.
«У адрозненне ад іншых авіякампаній, «Белавія» не вярнула багаж, не прадаставіла месцы ў гатэлі, не карміла і не выпускала з тэрмінала. Пасажыры, у тым ліку маленькія дзеці, спалі на лаўках», — наракае Юрый.
У прэс-службе авіякампаніі патлумачылі:
«Рэйс авіякампаніі «Белавія» з Мінска ў Мюнхен не атрымаў дазволу на пасадку ў аэрапорце Мюнхена праз умовы надвор’я і быў накіраваны дыспетчарамі ў Франкфурт. Праз цыклон «Сабіна» і моцны бакавы вецер праца аэрапорта «Мюнхен» была прыпыненая, прылёты і вылеты адмененыя, праца службаў, якія адказваюць за багаж, была прыпыненая таксама. Усе гатэлі Мюнхена былі загружаныя, праз гэта авіякампанія не змагла размясціць пасажыраў, якія чакалі вылету ў Мінск. Аднак «Белавія» прадаставіла ваўчары на харчаванне. Пасажырам, якія вымушана апынуліся ў аэрапорце Франкфурта, прадаставілі і трансфер, і пражыванне, і харчаванне. Самалёт кампаніі «Белавія» з Франкфурта ў Мюнхен вылецеў сёння ў 11.50 гадзін па мінскім часе», — адказалі ў «Белавія».
Цяпер чытаюць
Вынеслі прысуд Паліне Зыль — блогерцы, якая стала нулявым пацыентам справы Гаюна, бо ў яе знайшлі тую самую спасылку ад Матолькі10
Каментары