«Наша Ніва» паведамляла, што пасля рашэння Расіі пра закрыццё мяжы з Беларуссю да адпраўкі на ўсходнюю і паўночную граніцы нашай краіны рыхтавалі сотні пагранічнікаў з іншых межаў РБ.
Мы зрабілі такую выснову на паставе паведамленняў афіцэраў, якія расказвалі, што іх уносяць у спісы служачых, з якіх, меркавана, будуць складзеныя змены для арганізацыі пагранічнага кантролю на граніцы з Расіяй.
Далей падзеі развіваліся так: некаторыя людзі, сапраўды, экстрана выехалі на ўсход і «начавалі ў сацыяльных аб'ектах», іншыя — рыхтаваліся ехаць.
Але пару дзён таму стала вядома, што ўсё адмяняецца.
Шараговаму складу прычыны адмены рашэння не патлумачылі.
Выглядае, што пагранічны кантроль на граніцы з Расіяй пакуль арганізаваны ўсё ж не будзе.
«Наша Ніва» папрасіла афіцыйнага прадстаўніка ДПК Антона Бычкоўскага расказаць, чаму так атрымалася.
«Пагранічнае ведамства ў гэтым дачыненні орган выканаўчы, будзе рашэнне адпаведнае — будзем яго выконваць, — сказаў Бычкоўскі. — Гэтае пытанне па-за кампетэнцыяй службы ДПК: каментаваць прыняцце ці не прыняцце пэўнага рашэння адказнымі асобамі.
Адзінае, што магу сказаць: варыянты былі самыя розныя, і нават кіраўнік дзяржавы з гэтай нагоды казаў, што павінен быць і план А, і Б, і Ц, і гэтак далей, на ўсе выпадкі, калі гэта можна спатрэбіцца.
Мы са свайго боку можам сказаць, што пагранічнае ведамства гатовае да любога развіцця падзей і любой каманды і будзе вырашаць задачы ў новай абстаноўцы».
Пагранічны камітэт пры гэтым не гатовы пацвердзіць ці абвергнуць сцверджанне пра тое, што пэўныя пагранічнікі на мяжы з Расіяй прысутнічаюць.
Цяпер чытаюць
Беларускія дальнабойшчыкі ўсё часцей выбіраюць для працы Германію замест Польшчы і Літвы. Расказваюць пра заробкі3
Каментары