У Брэсцкай гарадской бальніцы занята 600 з 680 месцаў, вызначаных пад COVID-19
У Цэнтральнай гарадской бальніцы Брэста ляжаць каля 600 пацыентаў з пнеўманіямі. Пра гэта паведамляе Zarya.by са спасылкай на галоўнага доктара ўстановы аховы здароўя Алега Вялічку.
У сярэднім паступае ад 30 да 50 пацыентаў у дзень.
— Пасля 20 красавіка некаторыя аддзялення бальніцы былі перапрафіляваны на аказанне дапамогі хворым з пнеўманіяй з Брэста і Брэсцкага раёна. Такое рашэнне было прынята, каб засяродзіць хворых у адным месцы, улічваючы, што сярод іх ёсць выпадкі, выкліканыя вірусам COVID-19. Гэтыя аддзяленні былі названыя інфекцыйнымі і ўводзіліся паступова, па меры неабходнасці. На сёння пад лячэнне пнеўманіі ў нашай бальніцы абсталявана 680 ложка-месцаў, — адзначыў галоўны доктар.
У бальніцы было прыкладна дзесяць кіслародных канцэнтратараў, але калі стала зразумела, што сітуацыя абвастраецца, набылі яшчэ 17. Заказ на пастаўку яшчэ дзесяці будзе выкананы ў маі.
На базе аднаго з аддзяленняў арганізаваны кантакт-цэнтр для тых, хто пасля змены не сыходзіць дадому, каб не падвяргаць рызыцы заражэння блізкіх. Галоўным чынам, гэта супрацоўнікі рэанімацыйнага аддзялення.
Алег Вялічка таксама заклікаў берасцейцаў выконваць правілы гігіены.
— Колькасць выпісаных кожны дзень расце. На сёння іх ужо больш за 400. І гэта радуе. Але, разам з тым, спрашчаць сітуацыю ні ў якім разе не трэба. Па-ранейшаму вельмі важна выконваць рэкамендаваныя меры і правілы паводзін: мыць рукі, насіць ахоўныя маскі, не збірацца вялікімі кампаніямі, дзе адначасовая рызыка інфікавання ўзрастае ў разы. У нас ёсць, на жаль, выпадкі, калі з-за пагарды такімі мерамі ў ЦГБ паступілі адразу чатыры сям'і з аграгарадка Страдзічы Брэсцкага раёна.
Акрамя Цэнтральнай гарадской бальніцы, пад прыём кавідных пацыентаў у Брэсце прыстасаваныя анкалагічны, туберкулёзны і скурна-венералагічны дыспансеры, а таксама некаторыя аддзяленні абласной клінічнай бальніцы.
З даследаванняў навукоўцаў вядома, што менш чым у 20% хворых на каранавірус развіваецца пнеўманія.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм14
Каментары