Выйшаў на свабоду 18‑гадовы блогер, якога судзілі за махінацыі з грашыма, сабранымі на лячэнне Вані Сцяцэнкі

38‑гадовая блогерка Яўгенія Тарасенка апублікавала ў інстаграме відэа з подпісам: «Дачакалася… Колькі мы заслугоўваем лайкаў?». На відэа 18‑гадовы Міхаіл, які паспеў стаць бацькам, пакуль знаходзіўся за кратамі, трымае на руках месячную дачку Агату і цалуе каханую.

Яўгенія падзялілася ў блогу, што хлопец зрабіў ёй сюрпрыз сваім з’яўленнем. Яна чакала Міхаіла 8 верасня, а яго выпусцілі ўчора. Блогер прыехаў у сушэрыю Soy, якая належыць Яўгеніі, і папрасіў персанал тэрмінова яе выклікаць.

Павялічыць

У выніку блогерка атрымала ад сваіх супрацоўніц паведамленне, што здарылася нешта жудаснае і яна тэрмінова патрэбная. Яўгенія прынеслася на месца праз 10 хвілін і пабачыла Драгуна.

Павялічыць

Нагадаем: Міхаіл Драгун і Яўгенія Тарасенка — папулярныя ў Гродне блогеры. У 2024 годзе пара нават паўдзельнічала ў праўладным рэаліці-шоу «Фабрыка блогераў».

Але многія пра іх даведаліся пасля гучнага скандалу з дабрачынным зборам.

Згодна з афіцыйнай інфармацыяй, разам са сваёй каханай Міхаіл прапаноўваў падпісчыкам за 10 рублёў удзельнічаць у розыгрышы, дзе галоўнымі прызамі былі смартфоны ці аўтамабіль. Арганізатары заяўлялі, што толькі невялікая частка грошай пойдзе на прызы, а ўсю астатнюю суму аддадуць на лячэнне хлопчыка. Збіралі грошы для васьмігадовага Вані Сцяцэнкі, у якога цяжкая генетычная хвароба — міядыстрафія Дзюшэна. Неабходны хлопцу ўкол каштаваў 2,9 мільёна даляраў.

Агулам блогерамі было сабрана 1,5 мільёна рублёў. Але маме хворага дзіцяці яны перадалі толькі 200 тысяч рублёў, 315 тысяч выдаткавалі на прызы для ўдзельнікаў стрыму. Астатняе пусцілі на шыкоўнае жыццё.

Міхаіл трапіў за краты, яшчэ калі яму было 17.

Сёлета ў ліпені яго судзілі. Драгуна прызналі вінаватым у прычыненні маёмаснай шкоды шляхам падману і злоўжывання даверам, а таксама ў паклёпе. Акрамя таго, каля 130 тысяч рублёў, якія суд прызнаў даходам ад злачынства, канфіскаваныя ў даход дзяржавы.

Міхаілу далі адзін год і шэсць месяцаў пазбаўлення волі.

У СІЗА Драгун знаходзіўся з сярэдзіны снежня 2025 года, а паколькі для непаўналетніх дзень у СІЗА залічваецца за два, то выйсці ён змог значна раней.

Яўгенія раней распавядала ў блогу, што дзіця яны планавалі загадзя, прычым ініцыятарам быў менавіта Міхаіл. 

Так атрымалася, што ў хуткім часе пасля таго, як пара даведалася пра цяжарнасць, Міхаіл трапіў за краты. У лістах з СІЗА ён прасіў каханую не рабіць аборт. 

Імя Агата для дачкі прыдумаў малады бацька. Для маці таксама было важна, каб дзіця насіла прозвішча Драгун.

Імаверна, у хуткім часе Міхаіл вернецца да блогерства. Яўгенія ўжо напісала, што хлопец будзе дзяліцца гісторыямі ў сваім тэлеграм-канале.

• 1
• 0
• 1
• 4
• 0
• 0
• 1
• 0