Жыхара Баранавіч затрымалі за тое, што ён гуляў ля прадпрыемства з сабакам у дзень прыезду Лукашэнкі
Раніцай 1 верасня мужчына выйшаў пагуляць з сабакам у лесе недалёка ад Баранавіцкага вытворчага баваўнянага аб'яднання (БВБА). Убачыўшы ў небе верталёт, ён стаў на дыбачкі, каб «падгледзець», што адбываецца на тэрыторыі прадпрыемства. І быў затрыманы, піша Intex-Press.
Месца, дзе затрымалі гараджаніна, знаходзіцца літаральна за пяць хвілін хады ад яго дома: ён жыве на вуліцы Фабрычнай побач з канцавым прыпынкам аўтобусаў. Па словах мужчыны, ён рэгулярна гуляе там з сабакам. Вось і сёння, каля 9:40, ён звыклым маршрутам адправіўся выгульваць свайго гадаванца.
— Я ішоў уздоўж плота БВБА, калі пачуў гук верталёта. Выцягнуў галаву над плотам (вышыня яго каля двух метраў), каб паглядзець на верталёт, што прызямляўся. І тут з лесу мяне паклікалі, — распавёў Яўген.
У лесе, па словах Яўгена, хаваліся вайскоўцы. Яны сталі распытваць у яго, што ён тут робіць, дзе ён жыве, ці часта гуляе ў гэтым месцы.
— У іх пытаннях не было ніякай агрэсіі, хутчэй, гучалі апраўдальныя ноткі. Маўляў, знайшоў час тут хадзіць. Мае пытанні яны перадавалі камусьці па рацыі. Потым прыехаў УАЗік і нас з сабакам адвезлі дадому. Прапаршчык, які нас вёз, даў «сяброўскую параду»: не шпацыраваць там на працягу найбліжэйшых дзвюх гадзін, — кажа Яўген.
Разгляд, па словах хлопца, доўжыўся каля гадзіны. Хоць мужчына мог быць дома ўсяго за пяць хвілін. Здарэнне гараджанін назваў абсурдам.
— Сітуацыя дайшла да абсурду. Апошнія рэсурсы сыходзяць на падтрыманне ілюзіі дабрабыту для Аляксандра Рыгоравіча і яго атачэння. Але крах непазбежны. І мяркуючы па ўсім, і міліцыя, і вайскоўцы самі не рады, што іх абдурылі, — рэзюмуе Яўген.
Беларусы сустракаюць вызваленых палітвязняў у Вільні ФОТЫ і ВІДЭА3
Каментары