У Пінску асудзілі 80-гадовага былога дырэктара школы. Яго віна — выступ на мітынгу
Рыгор Сямёнавіч Бурван у мінулым настаўнік, дырэктар школы. У жніўні гэтага года яму пайшоў 81-ы год, паведамляе Медыя-Палессе.
16 жніўня ён выступіў на плошчы Леніна перад некалькімі сотнямі пінчукоў, якія пратэстуюць супраць фальсіфікацыі выбараў і гвалту з боку праваахоўных органаў.
Праз некаторы час Рыгора Сямёнавіча наведаў міліцыянер і склаў адміністрацыйны пратакол аб удзеле ў несанкцыянаваным масавым мерапрыемстве.
16 верасня пенсіянера выклікалі ў суд.
Ад сказанага на плошчы ў прысутнасці шматлікіх сотняў людзей і дзясятка міліцыянераў Рыгор Сямёнавіч не адмовіўся.
— Я даведаўся, што будзе мітынг у горадзе. Думаю, пайду і я, пагляджу на людзей, сябе пакажу. Пайшоў, паглядзеў, паслухаў што людзі кажуць. Нармальныя людзі, вочы нармальныя, ні аднаго наркамана я там не ўбачыў, ніхто там нікому нічога не дае. Людзі выступаюць, плачуць. Сярод прысутных на мітынгу шмат маіх вучняў. Падыходзяць, вітаюцца, рукі паціскаюць. Я паслухаў, што яны гавораць і вырашыў выказацца наконт таго, што адбываецца са мной і з тымі, хто быў на плошчы. Папрасіў мікрафон і выступіў. Сышоў з трыбуны. Мае вучні падыходзяць да мяне, руку ціснуць, абдымаюць. Апладысменты былі. А я думаю, а што я такога істотнага сказаў? Быццам бы нічога істотнага, проста выказаў сваё меркаванне. Але пасля таго, як людзі сталі падыходзіць, абдымаць, значыць, нешта я істотнае сказаў, чымсьці я крануў душу людзей…
— Мне зразумела, што напісана ў пратаколе, — працягнуў Рыгор Бурван. — Але мне не ясна тое, чаму мяне прыцягваюць…
— Я абараняў Канстытуцыю. Я абараняў дзяржаву, радзіму. Я абараняў яе ад ўзурпацыі і гвалтоўнага ўтрымання ўлады, што з'яўляецца найцяжэйшым злачынствам…
Як толькі Рыгор Сямёнавіч скончыў сваю прамову са спасылкай на артыкул крымінальнага кодэксу, які прадугледжвае пакаранне за ўзурпацыю ўлады, суддзя Клімовіч абвясціў рашэнне суда — Рыгора Бурвана прызнаць вінаватым па ч.1 арт. 23.34 КаАП «Удзел у несанкцыянаваным масавым мерапрыемстве» і вынесці яму папярэджанне.
Цяпер чытаюць
«Усе гундзелі, бурчэлі». Лукашэнка расказаў, што ў войску былі незадаволеныя, што навучаць іх запрасілі вагнераўцаў4
Каментары