Малітвы, гімн і «Са-ба-чку». Па Мінску прайшоў нешматлікі марш лукашэнкаўцаў РЭПАРТАЖ
Каля 19-й гадзіны на плошчы Незалежнасці збіраецца пару дзясяткаў чалавек. Гэта ўдзельнікі марша ў падтрымку дзеючай ўлады, які павінен прайсці па праспекце Незалежнасці і да плошчы Перамогі.
Перад пачаткам нейкі барадач праводзіць інструктаж: «Толькі беларуская сімволіка! Калі выказваюць агрэсію ў наш бок, мы не адказваем агрэсіяй, прызнаемся ў любові!»
Паралельна людзям раздаюць па два чырвоныя гваздзікі.
«Па дарозе спяваем гімн, «Кацюшу», «День Победы», — працягвае інструктаж барадач. — На плошчы Перамогі хвіліна маўчання, гімн, «День Победы».
Пасля мітынгоўцы чытаюць малітву і пачынаюць рух, побач ідзе здымачная група БТ (тэарэтык містычнай вайны Азаронак і аператар), гэтаксама трохі збоку трымаецца непрыкметны мужчына з рацыяй. Паралельным курсам па іншым баку дарогі едзе мікрааўтобус з сілавікамі.
«Усё легальна, шэсце ўзгодненае, падавалася заяўка ў Мінгарвыканкам на сёння і на 14 кастрычніка», — кажа «Нашай Ніве» барадач, які праводзіў інструктаж.
Ён прадстаўляецца Сяргеем — без прозвішча і роду заняткаў. «Афіцэр запасу», — адказвае на пытанне пра прафесію.
Сяргей кажа, што шэсце прымеркаванае «да адзінства беларускага народу, супраць фашысцкай сімволікі і сімволікі ЛГБТ, супраць хлусаў, якія падманваюць беларусаў».
Спачатку калона брыдзе моўчкі, затым з партатыўнай калонкі ўключаюць гімн. Наперадзе нясуць укрыжаванне, ікону і плакацік «Мы за бацьку».
Народу няшмат, таму хтосьці прапануе: «Расцягвайцеся!»
Па дарозе, шэсце пару разоў спыняецца. Спяваюць гімн, затым ідуць далей.
Агрэсіі з боку мінакоў, якой баяліся пры інструктажы, няма. Людзі ў асноўным весяляцца, адпускаюць каменты: «О, тысячы іх», «Нешта сціпленька ідуць», «Чаму ніхто не разганяе?»
Моладзь ля Макдональдса крычыць удзельнікам шэсця: «Са-бач-ку!», вулічныя музыкі ў пераходзе адразу зацягваюць «Тры чарапахі», убачыўшы чырвона-зялёныя сцягі.
Ніхто не кідаецца на шэсце і не спрабуе абразіць — мінакоў хутчэй хвалюе, як бы не трапіць у кадр нешматлікіх журналістаў, каб іх не палічылі ўдзельнікамі.
Чым бліжэй да плошчы Перамогі, тым актыўнейшыя мітынгоўцы. Часцей крычаць «За Беларусь!», «За Лукашэнку!», праз калонку ўключаюць «Саня останется с намі!».
На плошчы Перамогі мітынгоўцы зладжваюць мінуту маўчання, затым згодна плану зацягваюць гімн і «День Победы».
Пасля крычаць «Ура!», зноў моляцца — і канец. Уклаліся роўна ў гадзіну.
Некаторыя павольна разыходзяцца, частка застаецца: абмяркоўваюць сёе-тое, фатаграфуюцца.
Наступны «Марш за Беларусь!» (так удзельнікі называюць мерапрыемства) пройдзе праз тыдзень.
Цяпер чытаюць
26‑гадовы Андрэй паехаў у Расію ў марскі флот. Але трапіў на вайну і загінуў — маці кажа, спакусіўся вялікімі грашыма7
26‑гадовы Андрэй паехаў у Расію ў марскі флот. Але трапіў на вайну і загінуў — маці кажа, спакусіўся вялікімі грашыма
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары