Вызвалены Васкрасенскі пра візіт Лукашэнкі ў СІЗА КДБ: Толькі моцны палітык здольны на такі крок
Толькі моцны палітык здольны на такі крок. Так ацаніў візіт Лукашэнкі ў СІЗА КДБ былы палітвязень Юрый Васкрасенскі. Пра гэта ён заявіў у эфіры БТ. Нагадаем, двум палітвязням, што сустракаліся 10 кастрычніка з Аляксандрам Лукашэнкам, змянілі меру стрымання. Пра гэта паведамілі ў эфіры БТ. На волю выйшлі член ініцыятыўнай групы Віктара Бабарыкі, бізнэсмен Юрый Васкрасенскі і дырэктар кампаніі PandaDoc Дзмітрый Рабцэвіч.
«Размова доўжылася каля 5 гадзін. Яна была вельмі прадуктыўнай, месцамі на падвышаных танах, але ў выніку завяршылася вялікім канструктывам. Па выніку сустрэчы з прэзідэнтам, мне даручана прыступіць да падрыхтоўкі альтэрнатыўных прапаноў па змяненні Канстытуцыі, таксама прапанавана падрыхтаваць свае думкі наконт далейшых крокаў з боку ўлады па вызваленні шэрагу асоб, якія не так грамадска небяспечныя для нашай краіны, як здаваліся на першым этапе», — сказаў Юрый Васкрасенскі.
Паводле яго слоў, з'явіўшыся ў СІЗА, Лукашэнка «паказаў, што чалавек мужны, моцны, гатовы трымаць удар».
Таксама ў эфіры БТ выступіў дырэктар PandaDoc Дзмітрый Рабцэвіч, каментуючы вынікі размовы з Лукашэнкам у СІЗА КДБ. Ён сказаў, што ў Беларусі створаны ўмовы для працы IT-галіны і ёсць перадумовы для далейшага развіцця.
Дзмітрый Рабцэвіч, лічыць, што ў структуры ПВТ «створаны ўсе ўмовы, каб плаціць нармальныя заробкі, развівацца, будаваць будучыню разам».
«Мне здаецца, што IТ-краіна пабудавана: ёсць плацдарм, веды, навыкі ў супрацоўнікаў, ёсць добрыя ўмовы, у прыватнасці дэкрэт і льготы, якія дазваляюць у будучыні развіваць галіны ў тым разрэзе, які ёсць цяпер, — сказаў ён. — Для бізнэсу створаны ўсе ўмовы. Магчыма, дэкрэт будзе дапрацоўвацца, змяняцца».
Каментары