Тое, што афіцыйныя крыніцы называюць «удакладненнем асобных паказчыкаў бюджэту», насамрэч — секвестр, і, відаць, не апошні сёлета. Піша ў сваім блогу на НН Аляксандр Класкоўскі.
На афіцыйных сайтах — разгул эўфемізмаў. Паведамляецца, што Лукашэнка указам № 264 ад 28 траўня «удакладніў асобныя паказчыкі» рэспубліканскага бюджэту на 2009 год.
Падшліфаваў, карацей кажучы. Фігуруюць і лічбы: даходы і расходы рэспубліканскага бюджэту на 2009 год зацверджаны ў суме Br54,9 трлн. пры нулявым дэфіцыце.
Здаецца, усё ціп-топ. Адзінае, што забываюцца паведаміць электарату (ну нашто яму нервавацца?), — якімі былі лічбы да «ўдакладнення». Паводле ж закона аб бюджэце, зацверджанага ўвосень, расходы планаваліся ў суме Br57,7 трлн. То бок блізу трох трыльёнаў як карова языком злізала.
Значна ж болей істотным ёсць вось што:
у ранейшы бюджэт закладаўся іншы рубель — «дадэвальвацыйны», пры курсе 2 125 да долара. Зараз, як вы разумееце, наш рубель значна палягчэў.
Іначай кажучы, новы варыянт бюджэту будзе напаўняцца (і наколькі паспяхова — асобнае пытанне) пусцейшымі грашыма, то бок рэальнае падзенне даходаў — значна большае, чым намінальнае.
Ці можна тут казаць пра секвестр? Пра гэта я запытаўся ў эканаміста Яраслава Раманчука.
«Так, гаворка ідзе пра тыповы секвестр, — сказаў эксперт. — Гэты ўказ — першае дакументальнае пацвярджэнне таго, што крызіс у краіне ўсё ж ёсць. Новыя лічбы трохі бліжэйшыя да рэальнасці, але гэта толькі пачатак працэсу значна большага скарачэння выдаткаў. Мяркуючы па ўсім, гэта не апошні сёлета секвестр».
Іначай кажучы, бюджэту пакуль што пусцілі толькі першую кроў. Яго рэжуць і абяцаюць зрабіць бездэфіцытным таму, што іначай МВФ не дасць грошай. Але ці ўдасца рэальна звесці па нулях — вялікае пытанне. Найхутчэй што вылезе дэфіцыт.
Галоўная ж праблема — чым той бюджэт напаўняць. Абвал экспарту падразае ўсе псеўдааптымістычныя разлікі пад корань.
І яшчэ: паводле незалежных эканамістаў, нас чакаюць не толькі новыя, болей радыкальныя секвестры, але і працяг дэвальвацыі.
Сёння Лукашэнка ладзіць нараду ў пытаннях сацыяльна-эканамічнага развіцця. Няўжо зноў прагучыць, што крызісу ў краіне няма?
Пачакаем свежай інфы. Адзінае, што можна прадказаць з вялікай доляй імавернасці, — Расію, якая так пракінула з крэдытам, сёння праскланяюць як след.
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары