МЗС Германіі абвясціў персонай нон грата работніка расійскага пасольства — як адказ на дзеянні Масквы, якая выслала нямецкага дыпламата пасля акцыі пратэсту, у якой той, на думку Крамля, удзельнічаў, піша ВВС.
Аналагічныя пастановы ў дачыненні да расійскіх дыпламатаў прынялі ў Швецыі і Польшчы.
«У адказ на неабгрунтаваную высылку расійскім МЗС польскага дыпламата МЗС Польшчы, зыходзячы з прынцыпу ўзаемнасці і ў каардынацыі з Германіяй і Швецыяй, прынятая пастанова аб прызнанні персонай нон грата супрацоўніка генконсульства РФ у Познані», — паведамілі ў Міністэрстве замежных спраў Польшчы.
«Мы праінфармавалі расійскага пасла, што работніка расійскай амбасады папрасілі пакінуць Швецыю. Гэта выразны адказ на недапушчальнае рашэнне выслаць шведскага дыпламата, які толькі выконваў свае абавязкі», — заявіла міністрка замежных спраў Швецыі Анн Ліндэ.
Раней расійскі МЗС заявіў, што тэрыторыю РФ павінны пакінуць дыпламаты са Швецыі, Польшчы і Германіі — з-за іх удзелу ў акцыях пратэсту ў падтрымку Аляксея Навальнага, якія праходзілі 23 студзеня.
Прадстаўнік МЗС Швецыі заяўляў, што шведскі дыпламат не браў удзелу ні ў якіх дэманстрацыях.
2 лютага на суд па справе Аляксея Навальнага прыйшлі дыпламаты амаль двух дзясяткаў краін, у тым ліку Швецыі, Польшчы і Германіі. Дыпламатаў размясцілі ў зале суда на зашклёным балконе.
Афіцыйная прадстаўніца МЗС Расіі Марыя Захарава заявіла, што іх паводзіны — гэта «не проста ўмяшанне ва ўнутраныя справы суверэннай дзяржавы, а самавыкрыццё непрыгожай і супрацьзаконнай ролі калектыўнага Захаду ў спробах стрымаць Расію».
Каментары