Bloomberg: Беларускія айцішнікі масава эмігруюць пад уплывам рэпрэсій
IT-сектар Беларусі, што прыносіў дзяржаве значныя даходы, на вачах распадаецца, піша сусветнае бізнэс-выданне.
Усім вядомы дадатак для абмену паведамленнямі Viber і легендарная анлайн-гульня World of Tanks з’явіліся дзякуючы таленавітым беларусам. У 2019 годзе экспарт прадуктаў ІТ-сектара прынёс Беларусі $2,2 мільярда. Аднак цяпер будучыня беларускага ІТ стаіць пад вялікім пытаннем, бо ўсё больш беларускіх спецыялістаў вымушаныя з’ехаць праз пераслед лукашэнкаўцамі, піша Bloomberg.
Некаторыя IT-кампаніі часткова ці цалкам перанеслі свае офісы за мяжу.
Японская кампанія Rakuten, якая валодае Viber, адна з першых закрыла свой офіс у Беларусі пасля жорсткага збіцця пратэстоўцаў АМАПам у жніўні.
Аляксандр Куўшынаў, топ-менеджар кампаніі Gurtam, якая стварае сістэмы для GPS-маніторынгу, пакінуў краіну пасля таго, як убачыў сябе на дзяржаўным тэлебачанні ў рэпартажы аб расследаванні ў Pandadoc — яшчэ адной тэхналагічнай кампаніі, дзе працаваў яго брат Віктар.
«Мы думалі, што гэта будзе кароткая працоўная паездка, таму нават не бралі зімовай вопраткі. Прайшло паўгода, мы ўсё яшчэ тут, а мой брат Віктар — за кратамі», — кажа 38-гадовы Аляксандр Куўшынаў, які цяпер жыве ў Вільні, куды часткова пераехала яго кампанія.
Вялізная страта для эканомікі Беларусі становіцца прыбыткам для суседніх краін, у прыватнасці, для Літвы, якая хутчэй за ўсе краіны ЕС рэгіструе высокатэхналагічныя кампаніі, бо імкнецца прыцягнуць у сваю эканоміку як мага больш інавацый.
Літоўскі ўрад стварыў для гэтага ўсе ўмовы. Беларускія кампаніі могуць паскорана атрымаць ліцэнзію, а супрацоўнікі — карыстацца льготамі. Акрамя гэтага, Літва спрасціла атрыманне візы для беларускіх IT-спецыялістаў.
Больш за 40 беларускіх IT-кампаній рэлакуюць у Літву больш за 900 супрацоўнікаў. Яшчэ 30 кампаній узважваюць такі перанос.
Літва — не адзіная краіна, куды пераязджаюць беларускія праграмісты. За іх змагаюцца таксама Польшча і Украіна.
Па словах Святланы Ціханоўскай, кампаніі, якія пакідаюць Беларусь, з радасцю вернуцца назад, калі Лукашэнка сыдзе. Менавіта таму большасць з іх пераязджаюць часткова, бо спадзяюцца, што сітуацыя палепшае.
«Мы ўсё так жа лічым Беларусь сваім домам, — кажа Аляксандр Куўшынаў. — Але чым даўжэй застаешся за мяжой, тым прасцей працягваць будаваць сваё жыццё тут — нават калі на радзіме сітуацыя зменіцца».
Цяпер чытаюць
Бабарыка, Золатава і яшчэ некалькі дзясяткаў былых палітвязняў заклікалі еўрапейскіх лідараў актыўней дамаўляцца наконт вызваленняў51
Каментары