Святлана Алексіевіч ўзнагароджана адной з вышэйшых узнагарод Германіі
Беларуская пісьменніца ўзнагароджана ордэнам «За заслугі перад Федэратыўнай Рэспублікай Германіяй». Вялікі крыж 1-й ступені яна атрымала з рук прэзідэнта ФРГ Франка-Вальтэра Штайнмаера. Урачыстая цырымонія прайшла ў аўторак, 15 чэрвеня, у Берліне, у палацы Бельвю — афіцыйнай рэзідэнцыі кіраўніка дзяржавы, паведамляе Deutsche Welle.
Ордэн быў заснаваны ў ФРГ у пачатку 1950-х. Адну з вышэйшых узнагарод Германіі ўручае федэральны прэзідэнт.
У 2014 годзе Святлана Алексіевіч атрымала Афіцэрскі ордэн Мастацтваў і літаратуры — ведамасную ўзнагароду Францыі, а годам пазней стала лаўрэаткай Нобелеўскай прэміі па літаратуры.
Штайнмаер у сваёй прамове закрануў шматмесячныя пратэсты у Беларусі. «Жаночы твар — у гэтага мірнага, адважнага і ўсё яшчэ жорстка прыглушанага імкнення да будучыні», — падкрэсліў кіраўнік дзяржавы.
Алексіевіч у прамове ў адказ адзначыла, што «камунізм яшчэ не мёртвы і гатовы даць апошні бой», мяркуючы па падзеях ва Украіне, Беларусі і Расіі. Гэты лад «жыве не толькі ў галовах Пуціна ці Лукашэнкі», і з гэтым, «нягледзячы на наш ідэалізм, трэба лічыцца», дадала яна.
Пісьменніца назвала цяперашнюю эпоху «бясчассем». «Толькі ў дваццатым годзе мы атрэсліся ад гэтага сну», — адзначыла Алексіевіч. Яна асабліва вылучыла неабходнасць працаваць з тымі беларусамі, хто ўсё яшчэ падтрымлівае ўладу. «Трэба тлумачыць, што мы сталі нацыяй», — сказала пісьменніца.
Будучая кніга Алексіевіч — пра беларускія пратэсты.
Мінскія ўлады расказалі, як будуць змагацца з «акіянам аўтамабіляў» у дварах2
Каментары