Дванаццаты тур чэмпіянату Беларусі па футболе яшчэ больш замацаваў на вяршыні барысаўскі БАТЭ.
Дванаццаты тур чэмпіянату Беларусі па футболе яшчэ больш замацаваў на вяршыні барысаўскі БАТЭ. Цяпер яго адрыў складае астранамічныя як для такога адрэзку першынства 11 пунктаў.
У цэнтральным матчы туру барысаўцы дома з буйным лікам перамаглі жодзінскае «Тарпеда». Першы гол забіў Сяргей Крывец, а потым дублем адзначыўся вундэркінд Максім Скавыш.
Мінскае «Дынама» досыць нечакана саступіла ў Ждановічах «Гомелю» — 1:2. Дубль у пераможцаў аформіў бразільскі легіянер Рэнан Брэсан, адзін з найлепшых гульцоў сёлетняга першынства.
Другі прадстаўнік Беларусі ў Лізе Еўропы МТЗ‑РІПА таксама прайграў «Нёману», з тым самым лікам — 1:2.
Парадаваў толькі наваполацкі «Нафтан», які ў гасцях адужаў мікашэвіцкі «Граніт» — 2:0. Абодва галы на рахунку абаронцы Дзмітрыя Вярхоўцава. Мабыць, станоўча адбіўся той факт, што за мінулай гульнёй хлопца назіралі купцы з французскага «Валансьена».
А на другое месца досыць нечакана выбіўся магілёўскі «Дняпро». Каманда ў гасцях перамагла аўтсайдэра «Смаргонь».
Брэсцкае «Дынама» таксама саступіла дома. «Мінску» — 1:2. Пасля гульні ў адстаўку падаў галоўны трэнер брэсцкай каманды Яўген Трацюк. Невядома толькі ці яе прымуць.
Паступова выбіраецца з ямы салігорскі «Шахцёр». «Гарнякі» з мінімальным лікам 1:0 выйгралі ў «Віцебска».
Турнірная табліца пасля 12 тураў выглядае наступным чынам:
БАТЭ — 31 пункт, «Дняпро» — 20, «Дынама» (Мінск), «Дынама» (Брэст), «Тарпеда», «Нёман», «Нафтан» — па 19, «Гомель» — 18, «Шахцёр» — 17, «Мінск» — 15, МТЗ‑РІПА — 14, «Граніт» — 11, «Віцебск» — 10, «Смаргонь» — 5.
Найлепшы бамбардзір Максім Скавыш (БАТЭ) — 10 галоў.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары