Выканаўчы дырэктар Apple Цім Кук адзначае дзесяць гадоў на гэтай пасадзе. У якасці бонуса ён атрымаў больш за пяць мільёнаў акцый тэхналагічнага гіганта.
Паводле справаздачы, пададзенай Apple у Камісію па каштоўных паперах і біржах ЗША, Кук ужо прадаў большую частку акцый больш чым за 750 мільёнаў даляраў. Пакет акцый — частка ўгоды, якую ён заключыў, калі змяніў сузаснавальніка кампаніі Стыва Джобса на пасадзе выканаўчага дырэктара, піша Бі-бі-сі.
Па ўмовах дамовы, памер узнагароды быў звязаны з паказчыкамі Apple на фондавым індэксе S&P 500. Каціроўкі Apple выраслі на 191,83% толькі за апошнія тры гады, а з тых часоў, як Кук узначаліў кампанію 24 жніўня 2011 года, кошт акцый Apple вырас на 1200%. Так што Кук свой бонус заслужыў.
Рынкавая ацэнка кампаніі, якая выпускае, у тым ліку, iPhone, iPad і MacBook, складае амаль 2,5 трлн даляраў.
Паводле дакументаў камісіі па каштоўных паперах, на гэтым тыдні Кук ахвяраваў акцыі Apple на 10 млн даляраў на дабрачыннасць, не назваўшы атрымальніка.
У 2015 годзе Кук сказаў, што перад смерцю раздасць усе свае грошы (згодна з індэксам Bloomberg, зараз гэта 1,5 млрд даляраў), і вядома, што ён ахвяраваў дзясяткі мільёнаў даляраў на дабрачыннасць.
Каментары