На Усходніх могілках Мінска 25 ліпеня адбыўся мітынг, прысвечаны 25-годдзю з дня смерці паэта, празаіка, драматурга, публіцыста, перакладчыка і кінасцэнарыста Уладзіміра Караткевіча (26.11.1930—25.07.1984).
Як адзначыў мастак і грамадскі дзеяч Мікола Купава, штогод у дзень памяці Караткевіча на яго магіле збіраюцца прыхільнікі творчасці пісьменніка з надзеяй на новае чытанне яго твораў, адкрыццё новага помніка вялікаму пісьменніку і яго невядомых рукапісаў. «Не ўсе творы Караткевіча ўвайшлі нават у збор яго твораў, з чым я сутыкнуўся пры стварэнні серыі малюнкаў да казак Караткевіча», — сказаў Купава. Паводле яго слоў, кожнае новае прачытанне гістарычнага рамана-эпапеі пісьменніка «Каласы пад сярпом тваім», прысвечанага пачатку нацыянальна-вызваленчага паўстання супраць рускага царызму 1863—1964 гадоў пад кіраўніцтвам Кастуся Каліноўскага, выклікае «прыліў упэўненасці і аптымізму, натхняе на новыя творчыя ідэі».
У мітынгу ўдзельнічалі пляменніца Караткевіча Алена Сінкевіч і яе муж Васіль Сінкевіч, якія з’яўляюцца захавальнікамі мемарыяльнага кабінета пісьменніка ў яго былой кватэры па вуліцы Карла Маркса, 40, у Мінску.
Сярод знакавых падзей гэтага года, звязаных з творчасцю пісьменніка, Сінкевіч назваў пастаноўку Валерыем Анісенкам спектакля паводле рамана «Каласы пад сярпом тваім» у Дзяржаўным тэатры беларускай драматургіі, а таксама пераклад на рускую мову рамана Караткевіча «Хрыстос прызямліўся ў Гародні», зроблены кандыдатам філалагічных навук, дацэнтам Беларускага дзяржуніверсітэта Пятром Жаўняровічам.
Удзельнікі мітынгу ўсклалі кветкі да магілы Караткевіча, выканалі духоўны гімн «Магутны Божа».
Цяпер чытаюць
Полк Каліноўскага паведаміў пра гібель трох байцоў2
Каментары