Лукашэнка заявіў, што на мігрантаў патрацілі 12,6 мільёна даляраў
Падчас наведвання транспартна-лагістычнага цэнтра ў Брузгах Лукашэнка заявіў пра малыя грошы, якія заходнія краіны выдзелілі на мігрантаў у Беларусі, піша БелТА.
«Пасля маёй учорашняй заявы няшчасныя $260 тысяч далі. Мы на тры дні раней палічылі: мы патрацілі на ўсе гэтыя мерапрыемствы (гаворка аб дапамозе бежанцам) $12,6 млн. Яны Чырвонаму Крыжу нашаму пералічылі $260 тысяч, — заўважыў ён. — Разумееце, такія мярзотныя. А чаму грошы не ідуць: нашы збеглыя там цяпер сядзяць — гэта тыя, хто ступенчата атрымліваў фінансаванне. Нават на жывёл, ахову прыроды, яшчэ нешта. А ішло праз Літву, Польшчу. І там сядзелі фільтры, якія адмывалі, адсмоктвалі гэтыя грошы. Цяпер іх няма».
«Трэба наўпрост Шаўцову (генсакратар Беларускага Чырвонага Крыжа) аддаць. А Шаўцоў патрыёт, і гэтыя грошы пойдуць толькі людзям. І не прыліпнуць да рук — няма пасярэднікаў. Таму думаюць, праз каго пералічыць грошы, каб скрасці палову», — сказаў Аляксандр Лукашэнка.
«Не хочуць — не трэба, мы разбяромся з гэтымі людзьмі. Але іх абараняць (Захад і Еўропу ў прыватнасці) мы не будзем. Яны першымі парушылі нашы дамовы аб рэадмісіі», — адзначыў Лукашэнка.
Каментары