Лукашэнка: Будзем прасіць мігрантаў вярнуцца назад, патрацілі на іх $25 мільёнаў
Беларусь будзе прасіць мігрантаў, якія знаходзяцца на мяжы, вярнуцца назад, але хапаць і вывозіць сілай нікога не будуць. Аб гэтым Лукашэнка заявіў у інтэрв'ю прапагандысту Дзмітрыю Кісялёву.
Беларускі палітык нагадаў, што калі гаварыў па тэлефоне з Ангелай Меркель, то яна папрасіла яго заняцца рэпатрыяцыяй гэтых людзей. «Я кажу: ведаеце, Ангела, такімі жорсткімі словамі давайце не будзем нават гаварыць, — расказаў Лукашэнка. — Гэта значыць, хапай адсюль і вывозь сілай. Я ёй адразу сказаў, у канцы ўжо, двойчы паўтарыў: я буду старацца вырашыць гэтую праблему да Новага года, таму што яна нам не патрэбная. Людзі боўтаюцца то ў Мінску, у Гродне і іншае. Ведаеце, як рэагуе насельніцтва. Мы будзем прасіць гэтых людзей, якія законна ў нас знаходзяцца па турыстычнай візе ў гасцініцы і іншае, каб яны вярнуліся назад, таму што гуманітарнага калідора не будзе. І я ўжо больш за тысячу вярнуў іх у Ірак, але я ёй прапанаваў вось гэтых».
Палітык адзначыў, што эвакуацыйныя рэйсы былі аплачаныя Іракам. Беларусь жа ўжо патраціла на ўтрыманне бежанцаў (Лукашэнка называе бежанцамі мігрантаў на беларуска-польскай мяжы — заўв. Рэд.), паводле даных толькі тыднёвай даўнасці, $12,5 млн. «Цяпер гэта будзе ў два разы больш», — заявіў Аляксандр Лукашэнка.
«Гэта значыць, увесь догляд, харчаванне, абаграванне, лячэнне…» — удакладніў Дзмітрый Кісялёў.
«Абсалютна», — пацвердзіў Лукашэнка.
«Сусветная арганізацыя аховы здароўя прыслала нейкія там панчохі, пракладкі, памперсы ці яшчэ нешта такое», — дадаў беларускі палітык.
Каментары