У 2022-м спаўняецца 500 гадоў з заснавання ў Вільні першай ва Усходняй Еўропе кнігадрукарні і выдання першай друкаванай кнігі ў Вялікім Княстве Літоўскім — «Малой падарожнай кніжкі» (1522).
З гэтай нагоды ўлады Літвы абвясцілі наступны 2022 год Годам Францыска Скарыны, паведамляе Пасольства Літвы ў Мінску.
Скарына — гуманіст, пачынальнік кнігадрукарства ў ВКЛ, літоўскі першадрукар, выдавец, пісьменнік і доктар медыцыны. Ён нарадзіўся ў багатай купецкай сям’і ў Полацку, які ў тыя часы быў найважнейшым гандлёвым цэнтрам ВКЛ.
Паміж 1519 і 1521 гадамі Скарына пасяліўся ў Вільні, прывёз туды друкарскае абсталяванне і запас паперы.
22 мая 1522 года ў доме віленскага бурмістра Якуба Бабіча Скарына заснаваў першую друкарню ва Усходняй Еўропе. Мяркуецца, што дом стаяў на скрыжаванні вуліц Вялікай (Дыджоі) і Шкляной (Сціклу). Тут ён выдаў першую кнігу ВКЛ, якая называлася «Малой падарожнай кніжкай». Дакладная яе назва невядомая, таму даследчыкі далі выданню назву паводле тэкста эпілога: «у гэтай малой падарожнай кніжцы…».
Каментары