У Казахстане пачаліся сутычкі з сілавікамі, людзі пратэстуюць супраць узвінчвання цаны на газ
З гэтага года ў Казахстане рэзка выраслі цэны на звадкаваны газ — з 60 да 120 тэнге за літр (з 0,14 да 0,27 даляра). Большасць жыхароў краіны запраўляе ім машыны. Гэта выклікала абурэнне людзей.
Пратэсты пачаліся ў Мангістаўскай вобласці — заходнім рэгіёне Казахстана, багатым на нафту і газ. 2 студзеня ў гарадах Жанаозен і Актау людзі выйшлі на вуліцы мітынгаваць. Іх лозунгамі сталі «Нетры — багацце народу» і «Газ па 50 тэнге». У панядзелак сталі адбывацца сутычкі з паліцыяй.
Урад пагадзіўся пайсці на саступкі, паабяцаўшы знізіць цану на звадкаваны газ да 85-90 тэнге.
«Калі сабекошт вытворчасці газу складае 100 тэнге, і гэта больш, чым жаданыя 50-60, то ў нас ёсць два варыянты: мы ці будзем сядзець у пастаянным дэфіцыце і нашы заводы ў нейкі момант проста спыняцца, ці будуць прымацца вось такія, можа быць, не вельмі папулярныя меры», — апраўдваўся міністр энергетыкі Казахстана Магзум Мірзагаліеў.
Людзей гэта не задаволіла. Пратэсты пачаліся і ў іншых гарадах — Курыке, Акшукуры, Атырау, Шымкенце. Больш мітынгоўцаў стала ў Актау і Жанаозене, дзе сабаралася па некалькі тысяч чалавек. У гэтых гарадах на плошчах ставілі палаткі і палілі вогнішчы.
Акцыі закранулі таксама Алматы і Нур-Султан. Да эканамічных патрабаванняў дадаліся і палітычныя: людзі выступаюць супраць карупцыі, кумаўства, беспрацоўя.
На пратэстах 4 студзеня было шмат затрыманняў. Часам даходзіла да абсурду, калі ў бус з затрыманымі заносілі немаўля ў вазку.
У Атырау народ прарваў кардон паліцыі.
А ў Астане (Нур-Султане) сабраўся мітынг рэкорднай для Казахстана шматлікасці.
«Нас натхнілі беларусы», — кажуць некаторыя з дэманстрантаў.
У Алматы ўлады адключылі інтэрнэт. Заблакаваныя два папулярныя інтэрнэт-сайты: Kaztag.kz i Orda.kz.
Увечары аўторка прэзідэнт Казахстана заявіў у твітары, што ў Мангістаўскай вобласці цэны на газ знізяць да 50 тэнге за літр.
Ён паабяцаў, што астатнія патрабаванні грамадзян разгледзяць на заўтрашняй нарадзе. І заклікаў не паддавацца «заклікам дэструктыўных асобаў, зацікаўленых у падрыве стабільнасці і адзінства грамадства».
Людзей запэўнілі, што не будуць прыцягваць да адказнасці за мітынгі.
Цяпер чытаюць
Як сёння жывуць Кузнечыкі, якія амаль два гады хаваліся ў пасольстве Швецыі, каб не трапіць у кіпцюры сілавікоў?2
Каментары