Прадстаўнік Ціханоўскай па выбарах: Ад стварэння выбарчых участкаў за мяжой адмаўляюцца, бо там немагчыма забараніць экзіт-полы
Спецпрадстаўнік Святланы Ціханоўскай па пытаннях выбараў Аляксандр Шлык пракаментаваў для «Нашай Нівы» рашэнне беларускіх уладаў цалкам адмовіцца падчас правядзення рэферэндуму ад стварэння выбарчых участкаў за мяжой.
Аляксандр Шлык адзначыў:
«Адмова ад адкрыцця ўчасткаў за мяжой, вядома, фактычна абмяжоўвае магчымасці для грамадзян Беларусі рэалізаваць свае правы.
Па розных ацэнках за мяжой знаходзяцца да паўмільёна грамадзян, большасць з якіх валодае выбарчым правам.
Трэба будзе ўважліва сачыць за тым, што будзе адбывацца з імі ў спісах выбаршчыкаў.
І яшчэ хачу нагадаць, што ў 2020 вынікі экзіт-полаў за мяжой радыкальна адрозніваліся ад афіцыйных вынікаў на такіх участках. На тэрыторыі РБ такіх разыходжанняў няма, таму што няма экзіт-полаў».
МЗС Беларусі, тлумачачы адмову ад стварэння выбарчых участкаў за мяжой, называла такія прычыны, як недахоп супрацоўнікаў у амбасадах, малая колькасць грамадзян, якія стаяць на консульскім уліку, небяспека каранавіруса і нават «тэрарыстычныя і экстрэмісцкія» пагрозы.
Нагадаем, як на замежных участках галасавалі падчас прэзідэнцкіх выбараў 2020 года.
У многіх пасольствах і консульствах Беларусі за мяжой галасы тады палічылі сумленна. Так, у Нью-Ёрку Святлана Ціханоўская па афіцыйных звестках атрымала 93,2%, у Мюнхене — 91,7%, у Тэль-Авіве — 91,5%, у Лондане — 80,1%, у Рыме — 79,7%, у Стакгольме — 75,6%. Але варта адзначыць, што экзіт-полы, якія праводзілі беларусы замежжа, давалі ёй нават 95% галасоў.
На ўчастках у Расіі Ціханоўская прайграла, але неістотна: у Санкт-Пецярбургу Ціханоўская набрала 45,8%, а Лукашэнка - 51,1%. Прыкладна тое ж самае было і ў Маскве. Пры гэтым там у асноўны дзень галасавання сотні людзей не змаглі прагаласаваць — участкі працавалі вельмі марудна.
Чытайце таксама:
Выбарчых участкаў за мяжой падчас рэферэндуму не будзе. Мала людзей, каранавірус, «тэрарыстычныя пагрозы»…
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары