Падпісаў ліст за Лукашэнку і трапіў у складаную гісторыю кахання. Што вядома пра першага беларускага медаліста Пекіна 

Згадваем асноўныя факты пра спартоўца.

Адзіны беларускі біятланіст, ад каго букмекеры чакалі вынікаў

Смольскаму 25 гадоў, ён у біятлоне з 2012-га. Нарадзіўся ў вёсцы Пясочнае, што ў Мінскай вобласці, вучыўся ў Капыльскай СДЗЮШОР. Акрамя біятлона, займаўся ў той час ваенным мнагаборствам.

У юнацкім узросце Смольскі неаднаразова браў медалі крупных стартаў. Так, у 2017-м годзе ён выйграў бронзу на юніёрскім чэмпіянаце свету ў гонцы пераследу, а ў сезоне 2017/2018 упершыню выступіў на Кубку свету.

Алімпіяда ў Пекіне — другія зімовыя Алімпійскія гульні для Антона. Лепшы індывідуальны вынік Смольскага на яго першых Гульнях у Пхёнчхане — 33-е месца ў гонцы пераследу, плюс была ў яго і 8-я пазіцыя ў складзе мужчынскай эстафеты. Таму срэбра Пекіна — першая алімпійская ўзнагарода ў жыцці спартсмена.

Павялічыць

Але ж у сезоне 2021/2022 Смольскі нарэшце пачаў паказваць вынікі. З этапаў біятлоннага Кубку свету Антон прывёз пяць медалёў — адно срэбра і чатыры бронзы. Пры гэтым у мінулым сезоне спартовец рэдка аказваўся на Кубку ў першай дзясятцы атлетаў.

Цікава, што Антон аказаўся адзіным прадстаўніком айчыннай мужчынскай зборнай па біятлоне, каго згадалі ў сваіх медалёвых прагнозах букмекеры. Але ж не з лепшым каэфіцыентам. У індывідуалцы канторы абяцалі Смольскаму месцы з 15 па 18-е, а каэфіцыент на яго перамогу складаў ажно 67.

Падпісаў ліст за Лукашэнку і трапіў у складаную гісторыю кахання

Смольскі — спартсмен-інструктар Спартовага камітэта беларускіх Ўзброеных сіл, а таксама падпісант так званага праўладнага ліста спартоўцаў, створанага ў супрацьвагу лісту спартоўцаў за сумленныя выбары. Разам з Антонам ліст падпісалі і іншыя яго калегі па зборнай — усе, апроч Ганны Солы. Пры гэтым сам Смольскі ніколі не выказваўся публічна ў падтрымку Лукашэнкі.

Павялічыць

Сярод зацікаўленасцяў хлопца - музыка і машыны. Як сведчыць мама Смольскага, любімая страва біятланіста — грэчневая каша. Уласным кумірам Смольскі лічыць вядомага расійскага біятланіста Антона Шыпуліна.

Хутчэй за ўсё, Антон таксама аказаўся прычынай разладу ў жаночай біятлоннай зборнай Беларусі. Справа ў тым, што нядаўна стала вядома пра канфлікт паміж біятланісткай Дзінарай Алімбекавай і яе калегамі па камандзе, перш за ўсё Ганнай Солай.

Меркавана, гэты канфлікт якраз звязаны са Смольскім, які цяпер знаходзіцца ў адносінах з Алімбекавай. Дзінара якраз аказалася адной з першых, хто павіншаваў Смольскага з медалём: «Выйшаў і зрабіў як мужчына. За мае ўчорашнія слёзы! Ганаруся! Ура».

Раней Смольскі быў жанаты з іншай біятланісткай, Дар'яй Іерапес. Хадзілі чуткі, што сустракацца з Алімбекавай Антон пачаў яшчэ падчас шлюбу з Іерапес. Пры гэтым Іерапес мае ад Смольскага дзіця — дзяўчынцы, якую клічуць Аляксандра, у чэрвені споўніцца тры гады.

За срэбра Пекіна Антон Смольскі атрымае ад дзяржавы 75 тысяч даляраў.

Чытайце яшчэ:

Антыкавідныя захады, мора святла і пратэсты каля кітайскай амбасады. Якім мы запомнім адкрыццё пекінскай Алімпіяды

Гонар за фрыстайл і біятлон ды гульні пад БЧБ. Як раней Беларусь выступала на зімовых Алімпіядах і чаго чакаць цяпер?

• 0
• 0
• 0
• 0
• 0
• 0
• 0
• 0