Лідары заходняга свету правялі тэрміновую канферэнцыю: сітуацыя вакол Украіны абвастрылася
СМІ паведамілі, што кіраўнікі заходняга свету сёння правялі тэрміновую тэлефонную канферэнцыю ў сувязі з сітуацыяй вакол Украіны. Ініцыятарам быў прэзідэнт ЗША Джо Байдэн. США ўвогуле праяўляюць намер дзейнічаць, калі што, у выпадку агрэсіўных дзеянняў Расіі рашуча.
Удзел у канферэнцыі прынялі прэзідэнт ЗША Джо Байдэн, федэральны канцлер Германіі Олаф Шольц, прэзідэнт Францыі Эмануэль Макрон, прэм'ер-міністр Вялікабрытаніі Борыс Джонсан, прэзідэнт Польшчы Анджэй Дуда, прэзідэнт Румыніі Клаўс Ёханіс, прэм'ер Італіі Марыа Драгі, генеральны сакратар НАТА Енс Столтэнберг, прэм'ер-міністр Канады Джасцін Трудо, старшыня Еўрапейскай камісіі Урсула фон дэр Ляен і старшыня Еўрапейскай рады Жан Мішэль.
Прэс-сакратар урада ФРГ Штэфен Хебенштрайт зрабіў па выніках канферэнцыі заходніх лідараў заяву і наўпрост сказаў пра небяспеку вайны. Сітуацыя ім ацэньваецца як «вельмі, вельмі сур'ёзная».
Удзельнікі канферэнцыі пацвердзілі гатоўнасць увесці радыкальныя санкцыі супраць Расеі ў выпадку парушэння тэрытарыяльнай цэласнасці і суверэнітэту Украіны. Мэтай дыпламатычных намаганняў з'яўляецца прымусіць Маскву пайсці на дээскалацыю.
Журналісты амерыканскіх тэлекампаній NBC і PBS са спасылкай на двух прадстаўнікоў амерыканскай адміністрацыі сцвярджаюць, што пачатак уварвання Расіі ў Украіну чакаецца на наступным тыдні. З іх слоў, афіцыйныя асобы ЗША чакаюць жахлівай крывавай кампаніі, якая пачнецца з двух дзён паветраных бамбаванняў і радыёэлектроннай барацьбы, за якімі рушыць уварванне з магчымай мэтай змены рэжыму.
Байдэн у найбліжэйшы час збіраецца стэлефанавацца з Пуціным. Макрон гэта збіраецца таксама зрабіць у суботу.
«Мы гатовыя да любых дзеянняў Расіі. Калі Расія распачне нейкія дзеянні, то наш адказ будзе імгненным, а падтрымка Украіны будзе працягвацца без перапынку», — запэўніў Джэйк Сэліван, дарадца прэзідэнта ЗША па нацыянальнай бяспецы, заявіўшы, што «ўварванне Расіі можа пачацца ў любы момант».
Каментары