Новы праект «Мова прафесіі» навучыць размаўляць па-беларуску, напоіць кавай і накорміць хот-догамі
«Мова прафесіі» — мабільны дадатак пад Android і iOS, які мусіць навучыць беларусаў размаўляць па-беларуску на працы. Спампаваць дадатак «Мова прафесіі», паглядзець, пра што гэта, падтрымаць праект ці падключыць сваю кампанію, каб у яе з’явілася падтрымка беларускай мовы, можна на сайце say.by.
Праект мае тры звязаныя паміж сабой кампаненты, якія прысвечаныя адраджэнню беларускай мовы:
1. Donar.by, на якім можна завесці профіль «донара беларускай мовы» і дзе можна «ахвяраваць» свой голас. З дапамогай donar.by тысячы валанцёраў сабралі ўжо 1000 гадзін беларускага маўлення для Mozilla Common Voice, натрэніравалі камп'ютар, каб ён мог разумець беларускую мову, і агучылі ўсе заданні для «Мовы прафесіі». А ці ёсць там ваш голас?
2. Непасрэдна mova.pro — мабільны дадатак, дзе можна практыкаваць беларускае маўленне і прайсці сертыфікацыю.
3. say.by, дзе можна пабачыць кампаніі, якія падтрымліваюць беларускую мову, і супрацоўнікі якіх ужо атрымалі сертыфікаты, На say.by можна знайсці профілі «донараў мовы» і нават паслухаць, як гучаць іх галасы.
На гэты момант ёсць наступныя сферы:
- Кавярні
- Крамы
- Запраўкі
- ІТ
- Кол-цэнтры
- Піваварэнне
- Музыка
- Асновы
Галоўны прынцып — дадатак размаўляе з вамі па-беларуску і прымушае вас гаварыць па-беларуску з ім. І, канешне ж, хваліць вас, калі атрымліваецца добра!
У дадатку можна:
- Паслухаць, як гучыць слова ці выраз
- Паслухаць і абраць правільнае вымаўленне
- Прачытаць тэкст ўголас
- Адказаць на пытанне ўголас
- Паўтарыць сказанае
- Запісаць пад дыктоўку
- Пералічыць рэчы на выяве
- Абраць выяву, якая адпавядае сказанаму
- Вывучыць неабходныя фразы
Акрамя прафесійных сфераў, дадатак знаёміць з асаблівасцямі беларускай фанетыкі, асновамі ветлівасці ды іншымі агульнымі тэмамі.
Праграму распрацоўвалі дзясяткі IT-спецыялістаў, навукоўцаў і мовазнаўцаў, а правільнасць беларускай мовы ў заданнях правяраў Інстытут мовазнаўства імя Якуба Коласа.
Яшчэ на этапе бэта-версіі некаторыя супрацоўнікі мінскіх кампаній прайшлі сертыфікацыю, а цяпер, у дзень Роднай мовы, запусцілі цікавую супольную акцыю!
Першыя 80 чалавек, якія пройдуць сертыфікацыйныя заданні у сферы кавярняў, атрымаюць бясплатную каву ад кавярняў «Над Нямігай», «Апостраф кава», «Лава Кавы», «Лаўндж-Бар «СЛЭШ».
Пасля таго, як чалавек праходзіць сертыфікацыю, яму прапаноўваюцца месцы, дзе яшчэ засталася кава ў падарунак. У гэтых месцах, будзьце ўпэўненыя, з вамі будуць размаўляць па-беларуску!
А вось кампанія АЗС А-100 21-га і 22-га лютага падорыць кожнаму зніжку ў 50% на хот-дог і залічыць яе на бірульку, калі вы атрымаеце сертыфікат валодання беларускай мовы.
Забраць сваю каву ці скарыстацца зніжкай можна да 28-га лютага.
Будуць дзейнічаць у гэтыя дні і павышаныя «зніжкі за мову». Калі вы будзеце размаўляць па-беларуску падчас замовы, кампанія за гэта падорыць зніжку. Напрыклад, на АЗС А-100 у дзень Роднай мовы будзе 25% зніжка на каву або грыль, а ў кавярні «Лава-кавы» — 50% на каву.
Усё больш і больш кампаній пачынаюць падтрымліваць беларускую мову, што добра ўспрымаецца беларусамі, якія прагнуць адраджэння сваёй роднай мовы!
Цяпер чытаюць
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч29
Каментары