Чатырох маладзечанцаў адправілі ў калонію за «счэпку» 9 жніўня 2020 году
У судзе Маладзечанскага раёна 12 красавіка агучылі прысуды за ўдзел у акцыі пратэсту 9 жніўня 2020 году. Антона Драздовіча, Аляксандра Новаша, Вольгу Чарняк і Руслана Шапунова абвінавацілі па ч. 1 арт. 342 КК (удзел у дзеяннях, якія груба парушаюць грамадскі парадак) за тое, што яны стаялі ў «счэпцы» з бела-чырвона-белым сцягам. Трох хлопцаў асудзілі да паўтары гады калоніі ва ўмовах агульнага рэжыму, а дзяўчыну — да года зняволення, паведамляюць праваабаронцы.
Згодна з версіяй абвінавачвання, 9 жніўня 2020 года Антон Драздовіч, Аляксандр Новаш, Руслан Шапуноў і Вольга Чарняк на «несанкцыянаваным масавым мерапрыемстве» ў Маладзечне сталі ў «счэпку», «выкрыквалі лозунгі і крычалкі, гучна пляскалі ў далоні, з мэтай здзяйснення правакацыйных дзеянняў, накіраваных на абвастрэнне сітуацыі на плошчы, разгарнулі палотны бела-чырвона-белага колераў. Двое з іх не толькі ўдзельнічалі, але і арганізоўвалі падобныя дзеянні, якія груба парушаюць грамадскі парадак.
Паводле матэрыялаў справы, 22-гадовая Вольга Чарняк 9 жніўня 2020 года ў вячэрні час, накінуўшы сабе на плечы разгорнутае палатно бела-чырвона-белага колеру, а таксама яе знаёмы 30-гадовы Аляксандр Новаш, рухаліся па вуліцы Прытыцкага ў бок плошчы Цэнтральнай у горадзе Маладзечна. Заклікаючы на плошчы мінакоў далучыцца да іх, яны неслі з сабой незарэгістраваную сімволіку, выкрыквалі лозунгі. Пасля 23— і 24-гадовыя мясцовыя жыхары Антон Драздовіч і Руслан Шапуноў далучыліся да іх, і ўсе пасля прынялі актыўны ўдзел у несанкцыянаваным мітынгу.
На судзе ўсе чацвёра прызналі віну.
Суд праходзіў каля двух тыдняў. Пракурорка Юлія Жук запрасіла ў суда для ўсіх абвінавачаных маладзечанцаў пакаранне ў выглядзе аднаго года і шасці месяцаў калоніі. Суддзя Вольга Дубовік вынесла такі прысуд тром хлопцам, а дзяўчыне прызначыла зняволенне на паўгода меншае.
Каментары