Салодкія мроі прапаганды: «У Лукашэнкі былі б вельмі вялікія шанцы выйграць на выбарах у Літве». А як насамрэч?
«Аляксандр Лукашэнка — вельмі харызматычны палітык, у якога былі б вельмі вялікія шанцы перамагчы на дэмакратычных выбарах у Літве». Пра гэта ў эфіры прапагандыста Ігара Тура заявіў літовец Станіславас Томас. Насамрэч, рэйтынг Лукашэнкі ў Літве — 4,3%. Вядома, гэта вышэй за 3%, але гэта зусім не тая падтрымка, з якой недзе перамагаюць. Вось яшчэ некалькі цікавых фактаў.
«У мяне няма такога адзінага погляду на Захад, для мяне Захад не з'яўляецца чымсьці адзіным цэлым. Ёсць куча супярэчлівых тэндэнцый у заходнім грамадстве.
Калі, напрыклад, Лукашэнка ўдзельнічаў бы ў дэмакратычных выбарах у Літве, і ён быў бы літоўцам, я ўпэўнены, што ў яго былі б вельмі вялікія шанцы выйграць на гэтых выбарах.
Проста таму, як харызматычна ён камунікуе і выказвае свае думкі», — мяркуе Томас, якога прапагандысты называюць «літоўскім адвакатам».
Але ці насамрэч Лукашэнка мог бы выйграць выбары ў Літве? Не зусім карэктна параўноўваць папулярнасць мясцовых палітыкаў і замежных, але Лукашэнка сярод літоўцаў мае адзін з самых высокіх антырэйтынгаў у параўнанні з іншымі замежнымі палітыкамі.
У сакавіку ў Літве быў складзены рэйтынг замежных палітыкаў. Лідарам сімпатый літоўцаў аказаўся ўкраінскі прэзідэнт Уладзімір Зяленскі, якому сімпатызавалі амаль 50% рэспандэнтаў, яшчэ каля 30% «хутчэй сімпатызавалі».
Макрону сімпатызуюць амаль 17% апытаных, а «хутчэй сімпатызуюць» яшчэ 56%. У польскага прэзідэнта Анджэя Дуды каля 14% і 54%.
А вось Лукашэнку літоўцы зусім не любяць.
Пра яго пазітыўна выказаліся толькі 1,5%, «хутчэй сімпатызуюць» яму толькі 2,8%. Такім чынам, агульная колькасць сімпатызантаў Лукашэнкі ў Літве — 4,3%. Вядома, гэта вышэй за 3%, але гэта зусім не тая падтрымка, якую малюе прапаганда.
Негатыўны рэйтынг Лукашэнкі ў Літве — каля 70%. Большы антырэйтынг сярод замежных палітыкаў у Літве толькі ў Пуціна.
Таксама ў эфіры прапагандысцкага шоу Станіславас Томас сцвярджае, што літоўцы хочуць прыватызаваць усю беларускую эканоміку.
Фобіі пра прыватызацыю — старая песня лукашэнкаўскай прапаганды. Увесь час Лукашэнка і дзяржаўныя СМІ малююць прыватызацыю замежнікамі як нешта страшнае і разбуральнае. Але раней у каварстве і хіжых намерах прапагандысты абвінавачвалі расійскіх алігархаў і заходнія карпарацыі. І ўпершыню — літоўцаў.
І тут несастыковачка. Прапаганда ўвесь час крычыць, што ў Літве крызіс, што там, нібыта, усю эканоміку развалілі і нічога не вырабляюць. А з іншага боку кажуць, што хіжы літоўскі бізнэс з маленькай краіны мае грошы на прыватызацыю прадпрыемстваў вялікай, моцнай і квітнеючай Беларусі.
Хто такі Станіславас Томас, які ўсё гэта гаворыць?
Гэты чалавек не ўпершыню маніпулюе фактамі, гістарычнымі звесткамі ў эфіры беларускай і расійскай прапаганды. Станіславас Томас у 2016 годзе прадстаўляў літоўскага палітыка і экс-прэзідэнта Раландаса Паксаса ў справе супраць Літвы. Нагадаем, Паксасу ў свой час абвясцілі імпічмент.
Еўрапейскі суд па правах чалавека (ЕСПЧ) высветліў, што адвакат Томас з'яўляецца самазванцам, і яму назаўжды забаронена прадстаўляць заяўнікаў ці іншым чынам дапамагаць ім у справах.
Таксама Томас быў вядомы тым, што ў 2019 годзе разбіў памятную шыльду ў гонар літоўскага генерала Ёнаса Нарэйкі і трансляваў гэты працэс у фэйсбуку. За гэта Томасу прысудзілі штраф і кампенсацыю шкоды.
У гэтым жа годзе ён спрабаваў балатавацца ў Еўрапарламент, але не здолеў сабраць неабходнай колькасці подпісаў. Разам са сваімі подпісамі Томас чамусьці здаў подпісы Казімераса Юрайціса. Юрайціса можна назваць паплечнікам Альгірдаса Палецкіса — літоўскага палітыка, які ў ліпені 2021 года быў прысуджаны да шасці гадоў пазбаўлення волі за шпіянаж на карысць Расіі.
На сваім афіцыйным сайце Томас сцвярджае, што з 2013 года з'яўляецца адвакатам у Прыднястроўі. У 2016 годзе ён становіцца адвакатам у Андоры і на Нармандскіх астравах. У 2014 годзе нібыта атрымлівае ажно тры званні «прафесара» ў Расійскім новым універсітэце (Масква), Еўразійскай юрыдычнай акадэміі (Алматы) і ва ўніверсітэце «Нархоз» (Алматы).
Каментары