Пра гэта гаворыцца ў рэзалюцыі, прынятай 21 верасня ў Мінску на Усебеларускім саміце прадпрымальнікаў «За права прадпрымаць!».
Індывідуальныя прадпрымальнікі прапаноўваюць прэзідэнту Беларусі разгледзець пытанне аб прафесійнай прыдатнасці і ступені адпаведнасці займанай пасадзе міністра гандлю, міністра эканомікі, а таксама міністра па падатках і зборах.
Пра гэта гаворыцца ў рэзалюцыі, прынятай 21 верасня ў Мінску на Усебеларускім саміце прадпрымальнікаў «За права прадпрымаць!». У мерапрыемстве, арганізаваным РГА «Перспектыва», узялі ўдзел прыкладна 200 прадпрымальнікаў з усіх рэгіёнаў Беларусі.
У рэзалюцыі таксама ўтрымліваецца патрабаванне дазволіць суб’ектам малога прадпрымальніцтва гандляваць беларускім півам у кіёсках і павільёнах, спыніць практыку канфіскацыі тавараў і накладання вялікіх штрафаў, аб’явіць мараторый на праверкі прадпрымальнікаў тэрмінам на два гады.
Апрача таго, прадпрымальнікі настойваюць на адмене забароны на наём ІП работнікаў, а таксама на аднаўленні кіёскаў у Мінску і іншых гарадах «для аптымізацыі рознічнага гандлю і падтрымкі тавараабароту».
У дакуменце падкрэсліваецца, што прадпрымальнікі гатовыя дапамагчы дзяржпрадпрыемства ў разгрузцы складоў, стварэнні новых працоўных месцаў. Яны таксама гатовыя аказваць падтрымку мясцовым бюджэтам і «дапамагаць людзям перажыць цяжкія часы, прапаноўваць даступныя, якасныя тавары». «Мы гатовыя ўсё гэта зрабіць, але без прымусу і навязвання нам цэн, квот, рэжыму найму і формы аплаты», — гаворыцца ў рэзалюцыі.
Удзельнікі канферэнцыі выступаюць за «рэальнае партнёрства бізнесу і ўлады», але супраць «імітацыі падтрымкі прадпрымальніцтва». «Мы пакідаем за сабою права абараняць нашы канстытуцыйныя правы, выказваць сваю грамадзянскую пазіцыю ўсімі законнымі сродкамі аж да забастовак і дэманстрацый у выпадку далейшага ігнаравання патрабаванняў і прапаноў саміту», — падкрэсліваецца ў прынятай рэзалюцыі.
Як паведаміў БелаПАН лідэр «Перспектывы» Анатоль Шумчанка, тэкст дакумента будзе адпраўлены ў Адміністрацыю прэзідэнта, Савет міністраў, абласныя выканкамы і Мінгарвыканкам.
Цяпер чытаюць
«У выніку ён сказаў мне: «Хопіць мяне шантажаваць, я хачу палюбавацца гэтымі дрэвамі». Аксана Колб расказала, пра што размаўляла са Статкевічам на мяжы88
Каментары