«Мерзні, мерзні, воўчы хвост». Пуцін прыгразіў спыніць пастаўкі энергарэсурсаў у ЕС
Уладзімір Пуцін падчас Усходняга эканамічнага форуму заявіў, што вайна ва Украіне ўмацавала суверэнітэт РФ, а таксама прыгразіў спыніць пастаўкі энерганосьбітаў у Еўропу.
Пуцін падчас Усходняга эканамічнага форуму прыгразіў, што Расія спыніць пастаўку энерганосьбітаў у Еўропу.
«Ёсць кантрактныя абавязацельствы. Будуць прымацца нейкія рашэнні палітычнага характару, якія супярэчаць кантрактам? Ды мы іх проста выконваць не будзем. І наогул нічога пастаўляць не будзем, калі гэта супярэчыць нашым інтарэсам. У гэтым выпадку, эканамічным. Ні газ не будзем пастаўляць, ні нафту, ні вугаль, ні топачны мазут, нічога не будзем пастаўляць», — прыгразіў Пуцін.
Мы будзем поўнасцю выконваць нашы кантрактныя абавязацельствы. Але калі нехта паспрабуе нам нешта навязаць, то, хачу адзначыць, тыя, хто навязвае, не ў тым становішчы знаходзяцца сёння, каб дыктаваць нам сваю волю. Няхай адумаюцца.
Але ў эканоміцы гэта ўсюды так, у тым ліку і ва ўнутранай эканоміцы. Калі вярнуцца да тых, пра каго вы казалі, пастаўляць нічога не будзем, як я сказаў, па-за рамкамі кантрактаў. Нічога навязанае рабіць не будзем. І нам застанецца толькі адно, толькі адно, як у вядомай рускай казцы, прыгаворваць: «Мерзні, мерзні, воўчы хвост».
Закранаючы вайну ва Украіне, Пуцін заявіў, што Расія нічога не страціла.
«Я думаю, што нічога мы не страцілі і нічога не страцім. З пункту гледжання набыцця, магу сказаць, што галоўнае набыццё — умацаванне нашага суверэнітэту, і гэта непазбежны вынік таго, што цяпер адбываецца», — заявіў Пуцін.
Пуцін чарговы раз сказаў, што Расія «нічога не пачала» з пункту гледжання ваенных дзеянняў, а «спрабуе іх скончыць».
«Пачаліся ваенныя дзеянні ў 2014 годзе, пасля дзяржаўнага перавароту ва Украіне тых, хто не хацеў нармальнага, мірнага развіцця і імкнуўся да падаўлення свайго ўласнага народа», — сказаў Пуцін.
Звярнуўся кіраўнік Расіі і да бізнэсоўцаў, заявіўшы, што папярэджваў іх пра магчымасць арышту і канфіскацыі актываў на Захадзе.
«Я папярэджваў — я ім у свой час казаў — вы там набегаецеся, абараняючы свае інтарэсы. У іх там нешта арыштавалі, рахункі, лодкі і гэтак далей. Папярэджваў пра гэта», — сказаў прэзідэнт Расіі.
На яго думку, лепш бы лодкі трымалі ў Расіі, а грошы ўкладвалі ў развіццё расійскай інфраструктуры». У гэтым выпадку бізнэсоўцы «нічога б не страцілі, усё было б тут, на радзіме, і прыбытак бы атрымлівалі ад укладзеных грошай».
Цяпер чытаюць
Гэты беларус даследуе рак — вось што ён кажа пра SPF ад меланомы, навуковы прагрэс і самы складаны ў лячэнні рак3
Каментары