За паўгода ў ДТЗ на беларускіх дарогах загінулі амаль 1500 буйных жывёл. Адных казуль — больш за тысячу
У першым паўгоддзі на беларускіх дарогах у ДТЗ загінулі амаль 1500 жывёл, расказалі ў Дзяржінспекцыі аховы жывёльнага свету.
За шэсць месяцаў 2022 года зафіксавана 1470 ДТЗ, у якіх загінула 1496 жывёл.
Часцей за ўсё падчас аварый гінулі казулі (1066 асобін) і ласі (344 асобіны). Акрамя таго, у ДТЗ загінулі 33 алені, 49 дзікоў і чатыры бабры.
Дзікія жывёлы выходзяць на аўтадарогі па розных прычынах. Часцей за ўсё — пры сезонных зменах месца пражывання, а таксама пры перасоўванні да месцаў кармлення.
«Некаторых дзікіх жывёл прыцягваюць раскіданыя дарожнымі арганізацыямі пясчана-солевыя сумесі, многія дзікія птушкі знаходзяць на ўзбочынах дарог дробныя каменьчыкі, неабходныя для стрававання. Часам дзікія жывёлы выходзяць на асфальт проста пагрэцца і абсохнуць ад расы, бо тэмпература асфальту звычайна вышэйшая за тэмпературу паветра. Нярэдка дзікія жывёлы выбягаюць на аўтадарогі пры пераследзе іх драпежнікамі або паляўнічымі сабакамі», — паведамілі ў Дзяржінспекцыі.
Таксама кіроўцам варта памятаць, што дзікія жывёлы найбольш актыўныя ў цёмны час сутак, таму ў прыцемках варта праяўляць павышаную пільнасць. Большую небяспеку ўяўляюць участкі дарог з дрэвамі і кустамі.
«Калі лось, алень, заяц або іншае дзікая жывёла ў начны час аказваецца ў святле фар, яна асляпляецца. Цемра за межамі пучка святла ўспрымаецца як сцяна і жывёліна, як правіла, пачынае кідацца, не бачачы нічога, акрамя асветленага ўчастка дарогі і запаленых фар. У такой сітуацыі варта спыніцца, выключыць святло фар (але пакінуць уключанымі габарытныя агні), уключыць аварыйную светлавую сігналізацыю, тым самым даць жывёліне час адаптавацца да цемры і пакінуць дарогу», — удакладнілі ў Дзяржінспекцыі.
У ведамстве таксама нагадалі, што пры выяўленні на дарогах параненых, траўмаваных, хворых або мёртвых дзікіх жывёл забараняецца іх забіраць, разбіраць ці перамяшчаць. Пра выяўленне тушы дзікай жывёліны неабходна паведаміць у міліцыю.
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары