На дэакупаваных тэрыторыях Харкаўскай вобласці знайшлі 10 катоўняў, створаных расійскімі вайскоўцамі
На дэакупаванай тэрыторыі Харкаўскай вобласці ўкраінскія следчыя знайшлі 10 катоўняў, уладкаваных расійскімі вайскоўцамі, паведаміў на брыфінгу кіраўнік Нацпаліцыі Украіны (НПУ) Ігар Кліменка, піша Радыё Свабода.
Адна з катоўняў, паводле слоў Кліменкі, была ўладкаваная ў Балаклеі, у аддзяленні паліцыі. Там у камерах утрымлівалі каля 40 людзей, арыенціровачна яны прабылі там да 48 дзён. Другую катоўню, як удакладніў кіраўнік НПУ, расійскія вайскоўцы ўладкавалі ў памяшканні гарадской друкарні.
«Былі катаванні — мы бачылі на руках у людзей сляды ад электрычных аголеных правадоў, па якіх пускалі ток, калі дапытвалі. Былі знойдзеныя малаткі і петлі. Цяпер мы праводзім следчыя дзеянні па ўстанаўленні ступені пашкоджанняў, якія атрымалі людзі», — заявіў ён.
Кліменка таксама расказаў яшчэ пра шэсць катоўняў, якія паліцэйскія выявілі ў Ізюме. Паводле яго слоў, ужо ўстаноўленыя падраздзяленні арміі Расіі, якія займаліся катаваннямі: гэта АМАП з Тальяці, падраздзяленні Расгвардыі, ФСБ і вайскоўцы так званай «ЛНР».
Кіраўнік НПУ паведаміў, што сярод тых, каго катавалі, выявілі замежных грамадзян. Імі аказаліся сямёра студэнтаў са Шры-Ланкі, якія вучыліся ў медыцынскім каледжы.
Кіраўнік Нацпаліцыі таксама пракаментаваў сітуацыю са знойдзенымі 15 верасня ў лясах пад Ізюмам масавымі пахаваннямі.
«На сённяшні дзень там налічваецца каля 445 пахаванняў. Характар цялесных пашкоджанняў, абставіны і прычыны смерці людзей устанаўліваем. Целы забітых людзей, пахаваных там з сакавіка, трэба будзе эксгумаваць і ідэнтыфікаваць. Гэта праца на шмат тыдняў, але мы давядзём яе да канца і вызначым, хто гэтым займаўся», — паабяцаў Кліменка.
Цяпер чытаюць
У Мінску кідаюць будаваць трэцюю лінію метро ў Зялёны Луг. Усе сілы пойдуць на чацвёртую, кальцавую8
Каментары