Макей выступіў супраць размяшчэння назіральнікаў на ўкраінска-беларускай мяжы
Міністр замежных спраў Беларусі Уладзімір Макей заявіў, што знаходжанне на ўкраінска-беларускай мяжы назіральнікаў з заходніх краін будзе трактавацца як уцягванне апошніх у вайну. Ён сказаў гэта ў кулуарах пасяджэння Рады МЗС СНД у Астане, адказваючы на пытанні журналістаў.
«Я тут згодзен з ацэнкай, якая прагучала з расійскага боку. Калі будуць накіраваныя адпаведныя прадстаўнікі заходніх краін на мяжу Беларусі і Украіны, то гэта азначае фактычна ўцягванне гэтых трэціх краін ва ўкраінскі канфлікт», — сказаў кіраўнік ведамства.
На пытанне, ці будзе размяшчэнне такога кантынгенту ўяўляць сабой пагрозу нацыянальнай бяспецы Беларусі, Макей адказаў так:
«Гледзячы з якімі намерамі прыйдуць гэтыя назіральнікі або якой зброяй яны будуць узброеныя. Але тое, што цяпер адбываецца і на паўднёвых нашых межах, і на заходніх, — мы бачым, што нагнятаецца істэрыя. І не проста ідзе, скажам, слоўная нейкая рыторыка. А робяцца канкрэтныя дзеянні: перакідаюцца баявая тэхніка, узбраенні, збіраюцца вайскоўцы. Вядома, мы не павінны закрываць на гэта вочы. Натуральна, будуць выпрацоўвацца адэкватныя меры рэагавання. У тым ліку і ваеннага характару», — заявіў Макей.
Прапанову размясціць на мяжы міжнародных назіральнікаў прэзідэнт Украіны Уладзімір Зяленскі выказаў учора, выступаючы перад лідарамі краін G7. На яго думку, гэта дапаможа зняць правакацыі і домыслы пра пагрозу Беларусі з боку Украіны.
Сёння па гэтым пытанні выказваўся таксама дзяржсакратар Рады Бяспекі Беларусі Аляксандр Вальфовіч, і ягоная пазіцыя была больш памяркоўная. Паводле ягоных слоў, калі Украіне гэта патрэбна, то хай і размяшчае, а Беларусь у гэтым удзельнічаць не будзе. Катэгарычна супраць ён выказаўся толькі супраць размяшчэння на беларуска-ўкраінскай мяжы вайскоўцаў з Захаду.
Чытайце таксама:
Вальфовіч: Калі Зяленскаму патрэбныя назіральнікі на мяжы, то хай ён і запрашае
Музыка Цім Суладзэ: Розніца 30 гадоў — тое, што адпавядае маім уяўленням пра адносіны38
Каментары