Экскурсаводаў будуць атэстоўваць на 5 гадоў, але палітычна ненадзейных да экзаменаў не дапусцяць
З наступнага года ў Беларусі экскурсаводаў і гідаў-перакладчыкаў будуць атэстоўваць тэрмінам на пяць гадоў, піша БелТА са спасылкай на дырэктара Дэпартамента па турызме Мінспорту і турызму Беларусі Ірыну Варановіч. Але палітычна ненадзейных да атэстацыі проста не дапусцяць.
Паводле чыноўніцы, да атэстацыі
не дапусцяць тых, у каго ёсць судзімасць за ўчыненне «злачынстваў, накіраваных на прапаганду вайны, распальванне расавай, нацыянальнай варожасці, абразу прэзідэнта, іншых прадстаўнікоў улады, здзек з дзяржаўных сімвалаў і іншае». Фактычна гэта трэба разумець, што ўсім былым палітвязням, незалежна ад кваліфікацыі, шлях у гэтую прафесію будзе закрыты.
Экзамен змогуць здаваць толькі тыя людзі, якія пастаянна жывуць у Беларусі. У іх павінна быць вышэйшая альбо сярэдняя спецыяльная адукацыя або яны павінны прайсці не менш за тры курсы адукацыйнай праграмы бакалаўрыяту.
Экзамен будзе складацца з камп'ютарнага тэставання і вуснага сумоўя. Тым, хто прайшоў выпрабаванні, выдадуць пасведчанне, пералік тэмаў экскурсій і бэйдж.
Пасведчанне будзе давацца на пяць гадоў, пасля яго трэба працягваць. Але дзеянне пасведчання могуць прыпыніць на тэрмін да года — калі з'явяцца «абгрунтаваныя скаргі з боку фізічных і юрыдычных асоб на якасць абслугоўвання». Без бэйджа з 1 студзеня 2023 года экскурсавод праводзіць экскурсіі не зможа.
Нацыянальны рэестр экскурсаводаў і гідаў-перакладчыкаў будзе фарміраваць і весці Мінспорту і турызму.
Каментары