Колькі каштуе арэнда ялінак? Паглядзелі прапановы і расцэнкі
Альтэрнатыва пакупцы елкі — узяць яе напракат. Такія варыянты прапануюць інтэрнэт-сэрвісы. Іх, аднак, няшмат. Там можна ўзяць жывыя елкі ў кадушцы або штучныя, нават упрыгожаныя.
Штучныя яліны для кватэр і карпаратываў
Расцэнкі на штучныя ялінкі залежаць ад вышыні, класа, а таксама наяўнасці ўпрыгожанняў.
Арэнда да двух месяцаў 1,5-метровай штучнай елкі без упрыгожвання вагаецца ад 240 да 310 рублёў. Сасна такой жа вышыні — ад 180 да 250 рублёў.
Такія расцэнкі, напрыклад, выставіў інтэрнэт-сэрвіс пракату дэкаратыўных аксесуараў «Мінскі дэкаратар». Найдаражэйшую арэнду ў іх мае 3-метровая елка класа «Рэалістык» — да 625 рублёў. 1,5-метровая «літая» сасна мае найменшую цану — 250 рублёў.
Узяць у арэнду ад 1 да 3 дзён елку «Мінскі дэкаратар» прапануе для карпаратыўных імпрэз і фотасесій. Штучная 1,5-метровая ялінка абыдзецца ў 120 рублёў, а вышынёй у тры метры — 370 рублёў.
Сэрвіс знаходзіцца ў Мінску, таму кліентам з іншых гарадоў трэба падумаць, ці самім прыехаць па заказ, ці замовіць дастаўку. У выпадку дастаўкі трэба даплаціць. Яе цана залежыць ад кошту арандаванага тавару.
Кампанія «Тавары для актыўных людзей Touristshop» прапануе ўзяць у арэнду 1,5-метровыя ялінкі без дэкору танней — за 130 рублёў. Трохметровыя елкі — 340 рублёў. Карыстацца імі можна да 2 месяцаў.
За двухмесячную арэнду яліны Standard з дэкорам вышынёй у 1,5 метра трэба заплаціць 280 рублёў. Трохметровая прыгажуня — 690 рублёў.
1,5-метровая елка Optimal — 340 рублёў, а 3-метровая — 860 рублёў.
Арэнда ўжо ўбранай да свята 1,5-метровай елкі Premium — 400 рублёў, а 3-метровай — 1030 рублёў.
Кампанія прапануе елкі і іншых памераў: 180, 220, 250 см. Іх арэнда вагаецца ад 360 да 820 рублёў.
Новы год з жывымі ялінкамі
Для прыхільнікаў адзначаць Новы год з жывой елкай таксама існуюць варыянты арэнды. Такога роду паслуг, аднак, няшмат.
Жывая елка больш экалагічная, чым пластыкавая. Пакуль расце — выдзяляе кісларод. Яе трэба паліваць два разы на тыдзень.
Жывыя яліны ў кадушцы прапануе ўзяць на 2-3-тыднёвы пракат фермерская гаспадарка з Гродзенскага раёна «Сядзіба Юбілейная». На яе інтэрнэт-пляцоўцы пазначаныя не толькі цэны, але і інструкцыі па доглядзе навагодняга атрыбута.
У фермераў елкі розных памераў, прадугледжаная дастаўка. На іх паслугі, аднак, могуць разлічваць толькі кліенты з Гродна і Мінска.
Найменшая, паўметровая елка для жыхароў Гродна каштуе 30 рублёў, Мінска — 60 рублёў.
Найбольш прыдатны варыянт для ўладальнікаў кватэр, раяць фермеры, — арандаваць звычайную елку памерам 60-100 см па цане 40 рублёў для Гродна і 70 рублёў для Мінска. Зручная для кватэрных умоў вышыня — 70-110 см. Гродзенцам такі памер елкі абыдзецца ў 50 рублёў, а мінчукам — у 80 рублёў.
Цана арэнды эксклюзіўнага варыянта блакітнай яліны да 2 метраў для гродзенцаў складзе 100 рублёў, а для жыхароў сталіцы — 130 рублёў. Фермеры засцерагаюць, што такія елкі найбольш уразлівыя і іх шанец на выжыванне ў няволі невысокі.
У выпадку, калі елка загіне, фермеры забяруць яе разам з кадушкай з зямлёй. Яны запэўніваюць, што кампенсацыі патрабаваць не будуць. Мінскім кліентам пачнуць дастаўляць ялінкі толькі 23 і 24 снежня.
У Гомелі на Каляды не будзе ніводнага беларускамоўнага свята для дзяцей
«Замест анёлаў — чырвонаармейцы, замест Віфлеемскай зоркі — савецкая пяціканцовая». У Гродне адкрылася выстава старых ёлачных цацак
«Наша Нiва» — бастыён беларушчыны
ПАДТРЫМАЦЬ
Каментары