Святлана Ціханоўская падчас рабочага візіту ў Фінляндыю сустрэлася з прэзідэнтам краіны Саўлі Нііністэ, а таксама з мэрам Хельсінкі Юхам Варціайненам. Апошняму яна прапанавала арганізаваць для беларусаў стажыроўкі ў гарадской радзе.
«З прэзідэнтам Нііністэ мы абмяркоўвалі ролю рэжыму Лукашэнкі ў вайне Расіі супраць Украіны і ў злачынствах супраць уласнага народа. Фінляндыя вельмі добра ведае кошт свабоды і незалежнасці. Яна таксама ведае, што такое жыць побач з суседам — рэваншысцкай імперыяй», — напісала Ціханоўская ў твітары.
Адносна сустрэчы з мэрам Хельсінкі яна сказала:
«Мы таксама абмяркоўвалі запрашэнне мастакоў і пісьменнікаў з Беларусі ў Фінляндыю, развіццё культурных праектаў, арганізацыю дзелавых візітаў і падтрымку рэпрэсаваных прафсаюзаў».
Напярэдадні лідарка беларускіх дэмсілаў правяла сустрэчу з прэм'ер-міністаркай Фінляндыі Саннай Марын, з якой абмеркавала падтрымку рэпрэсаваных беларусаў, незалежных СМІ і сітуацыю ў нашай краіне.
Каментары