Завяршылі рамонт пантоннага моста паміж Чыжоўкай і Серабранкай у Мінску
Скончылі рамонтныя работы на пантонным мосце паміж Чыжоўкай і Серабранкай у Мінску — ён стаў больш трывалы і бяспечны. Пра гэта паведамляюць «Мінск-Навіны» са спасылкай на Сяргея Масляка, кіраўніка адміністрацыі Заводскага раёна.
У мінулым годзе ў раёне была добраўпарадкавана зона адпачынку «Спякота»: тут з'явіліся «сцежка бяспекі» і экалагічны адукацыйны комплекс «Чомга-востраў». Каб злучыць экасцежку ў Серабранцы з аналагічнай у Чыжоўцы і даць магчымасць аматарам прыроды вывучыць флору і фаўну Чыжоўскага вадасховішча, гарадскія ўлады вырашылі паставіць тут пантонны мост. У гэтым месцы з-за моцнай плыні ракі магчымы быў толькі такі варыянт.
Мост звязаў набярэжную вадасховішча з востравам, размешчаным на ўчастку паміж Серабранкай і Чыжоўкай. Але гараджане паскардзіліся, што ён не надта ўстойлівы, да таго ж да яго няма бяспечнага падыходу. Гэтыя моманты ўлічылі і пачалі рамонт аб'екта.
«Былі ўмацаваны парэнчы, выкананы зварачныя работы, выкладзены прыступкі з пліт — цяпер спуск да моста ўжо не такі стромкі, як раней, а больш спадзісты», — паведаміў Сяргей Масляк.
Каментары