«Зрабіце хаця б выгляд, што мы клапоцімся пра грамадзян». Як Дзярждума РФ прымала закон аб электронных армейскіх позвах ВІДЭА
Учора Дзярждума РФ прыняла ў другім і ў канчатковым трэцім чытанні законапраект аб уручэнні электронных позваў. Ён, па сутнасці, закрывае выезд з краіны тым, хто не хоча ваяваць, і абмяжоўвае ў правах ухілістаў.
Падчас чытання праекта дэпутат ад КПРФ Ніна Астаніна назвала непавагай да дэпутатаў і выбаршчыкаў прыняцце закона з такой хуткасцю.
«Прымаць цэлы закон пасля таго, як мы паслухалі тэлевізійныя інтэрвʼю, і за дзве гадзіны, седзячы ў гэтай зале, паглядзелі тэкст гэтага закона, — вось такога яшчэ не было на маёй памяці і на памяці маіх калег», — сказала яна.
Пры гэтым, па словах Астанінай, аўтары праекта самі не могуць «выразна» адказаць на пытанні пра яго. «Калі нашы выбаршчыкі спытаюць пра змест кожнага артыкула законапраекта, я не магу адказваць гэтак жа невыразна, як, на жаль, не крыўдуйце, Андрэй Валерʼевіч [кіраўнік думскага камітэта па абароне Картаполаў], вы адказвалі на нашы пытанні. Вы працягваеце кожны раз адказваць: «Падыдзіце да нас, я вам растлумачу». Калі ласка, тлумачце нам публічна», — сказала дэпутатка.
Астаніна давяла, што ў дакуменце ёсць «прыкрыя нядбайнасці і памылкі друку», а таксама недапрацоўкі. У прыватнасці, у тэксце згаданы Пенсійны фонд, якога ў Расіі ўжо не існуе, ён быў скасаваны ў пачатку 2022 года.
«Ну зрабіце вы хаця б выгляд, што мы клапоцімся пра грамадзян!» — сказала яна.
Разглядам праекта застаўся незадаволены дэпутат ад КПРФ Мікалай Каламейцаў. Ён заявіў, што пакет паправак «сурʼёзна» парушае рэгламент і яго нельга было прачытаць за такі кароткі тэрмін, бо 58 старонак асноўнага тэксту і 80 старонак паправак былі ўнесены ў базу ў 13:29 гадзін таго ж дня.
Нягледзячы на гэта, за прыняцце законапраекта дэпутаты прагаласавалі аднагалосна, супраць — ніхто.
Толькі адзін устрымаўся. Гэта быў дэпутат ад партыі «Справядлівая Расія — за праўду» Дзмітрый Кузняцоў. Аднак ён пазней патлумачыў, што зрабіў гэта выпадкова — проста «памылкова націснуў не тую кнопку».
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары