Для Расіі старажытная Русь больш не Кіеўская? Мяркуючы па новым падручніку, так
У новай рэдакцыі расійскага падручніка «Навакольны свет» для чацвёртага класа выдавецтва «Просвещение» прыбралі некалькі згадак Кіева ў параграфах, якія тычацца гісторыі Кіеўскай Русі. Заўважыла гэта выданне «Медыязона», журналісты якога азнаёміліся з некалькімі старонкамі адрэдагаванага падручніка і параўналі іх з версіяй 2021 года.
Калі ў старым выданні гаварылася, што летапіс «Аповесць мінулых гадоў» напісаў манах Кіева-Пячэрскага манастыра Нестар, то ў новай версіі Нестар названы проста манахам, без удакладнення месца, дзе ён жыў і працаваў.
Іншая змена: у старой версіі гаварылася, што князь Уладзімір хрысціў увесь народ у Кіеве, а ў новай — што «ў сталіцы».
Яшчэ адно: было «пасля смерці Алега ў Кіеве стаў кіраваць князь Ігар», а стала — «пасля смерці Алега Руссю стаў кіраваць князь Ігар».
Акрамя таго, у падручніку па гісторыі Расіі за шосты клас памянялася дата, якая лічыцца момантам заснавання Русі як дзяржавы. У рэдакцыі 2016 года гаворыцца: «882 год, калі Алег аб'яднаў Ноўгарад і Кіеў, многія гісторыкі называюць умоўнай датай утварэння Старажытнарускай дзяржавы». У рэдакцыі 2023 года напісана: «Паступова найбольшае значэнне набыла дынастыя князёў, якія ўзводзілі свой род да Рурыка. З яго запрашэннем у 862 годзе ў Ноўгарад звязваюць утварэнне дзяржавы Русь».
Новая рэдакцыя падручніка «Навакольны свет», праўда, пакуль яшчэ не паступіла ў продаж — яна толькі адпраўленая ў друк.
Акрамя новай рэдакцыі падручніка, да выпуску рыхтуюцца метадычныя матэрыялы, у якіх удакладняецца роля Кіева ў гісторыі Расіі. Як мяркуе суразмоўца «Медыязоны» у выдавецтве «Просвещение», гэтыя матэрыялы паступяць у школы да канца вясны і будуць выкарыстоўвацца ў наступным навучальным годзе.
«Медыязона» яшчэ ў красавіку 2022 года пісала, што ў выдавецтве «Просвещение» рыхтуюць новыя рэдакцыі падручнікаў. «Адзін раз згадваем, што была ўтвораная Кіеўская Русь, а далей называем яе проста Русь, няма больш Кіеўскай Русі. А Кіеў — яе сталіца, — расказваў адзін з супрацоўнікаў выдавецтва. — Як бы гэта дзіўна ні гучала, але ў ідэале [трэба] замяніць радок пра тое, што «Уладзімір хрысціў Кіеў» на словы, што ён «хрысціў сталіцу».
Пасля Уладзімір Мядзінскі, памочнік Пуціна і былы міністр культуры, пацвярджаў, што ў Расіі з'явяцца адзіныя падручнікі гісторыі, напісаныя «з улікам гістарычных падзей, якія адбыліся сёлета». «Гэта і пачатак спецыяльнай ваеннай аперацыі, і ўваходжанне ў склад РФ Данецкай і Луганскай народных рэспублік, Запарожскай і Херсонскай абласцей, і беспрэцэдэнтны санкцыйны ціск. Гэтыя факты, вядома, знойдуць сваё адлюстраванне ў новых падручніках», — удакладняў Мядзінскі.
Патрыярх Кірыл у звароце да беларускага народа гаварыў пра «прасторы Русі» і «ўскраінныя землі»
Гісторык: Варагі загаспадарылі на Русі, бо заслугі ставілі вышэй за выслугу
ВКЛ — перадавое, Рэч Паспалітая — цяжкае выпрабаванне, Расійская Імперыя садзейнічала развіццю, а БНР — «тупіковы напрамак». Як выглядае лукашысцкае бачанне гісторыі Беларусі
Цяпер чытаюць
Лукашэнка загадаў забараніць арганізаваныя паездкі дзяцей за мяжу без дазволу дзяржавы15
Каментары