Беларуская «Экономическая газета», якая спыніла выхад з ліпеня, займее новага ўладальніка, паведамляе «Белсат» на падставе сведчання сваіх крыніц. У выніку выданне стане часткай медыяхолдынгу.
Паводле інфармацыі крыніц «Белсата», выданне купляе медыяхолдынг ТАА «Галаўная кампанія Уладзіміра Граўцова». Дэталі здзелкі невядомыя. Верагодна, гаворка ідзе пра куплю брэнда і сайта выдання.
Пакуль невядома, якой будзе новая рэдакцыйная палітыка «Экономической газеты», але прынамсі напачатку яе працу будзе падтрымліваць наяўны калектыў.
ТАА «Галаўная кампанія Уладзіміра Граўцова» была заснаваная 13 кастрычніка 1992 года. Паводле каталогу прадпрыемстваў Беларусі, асноўная дзейнасць кампаніі ўключае перыядычныя выданні, кнігі і бератары, рэкламныя прадукты, інфармацыйныя інтэрнэт-рэсурсы, сетку аптэк, аналітычныя прававыя сістэмы, адукацыйныя імпрэзы, агенцтва дзелавой падпіскі і касметалагічныя паслугі.
У медыяхолдынг сярод іншага ўваходзяць ТАА «Выдавецкі дом Граўцова», ТАА «Белзнешрэклама», ТАА «Аптэчная справа». Як заяўляецца, кампанія ўяўляе сабой больш як 40 прадуктаў і сэрвісаў, больш за 900 працаўнікоў, больш як 200 000 падпісчыкаў на месяц.
Выданне «Экономическая газета» выходзіла з 1992 года. 14 мая 2025 года галоўны рэдактар Фёдар Велікаселец паведаміў, што выпуск выдання спыняецца з ліпеня. Паводле яго, такое рашэнне прыняў сход акцыянераў таварыства «Белбізнэспрэс», які ёсць заснавальнікам і выдаўцом «Экономической газеты».
Галоўны рэдактар тлумачыў такое рашэнне змяненнямі ў інфармацыйнай сферы, калі «няма ніякіх праблем у атрыманні патрэбнай інфармацыі цягам хвіліны-другой», у выніку чаго «папяровым выданням з іх цыкламі друку і дастаўкі даводзіцца саступаць месца электронным сродкам масавай інфармацыі». З паведамлення пры гэтым не было зразумела, ці працягнуць працаваць сайт і іншыя рэсурсы выдання.
Цяпер чытаюць
Арыштавалі прадстаўнікоў кампаніі Bayer у Беларусі1
Каментары