Мэблю з культавай кавярні «У Дзеда» набылі для музея-сядзібы «Стары Менск»
Уладальнік музея-сядзібы «Стары Менск» Глеб Лабадзенка расказаў на сваёй старонцы ў фэйсбуку, як рэчы з аднаго вядомага месца набываюць другое жыццё ў іншым.
«Многія менчукі бывалі ў кавярні «У Дзеда», якая спачатку месцілася ў касах стадыёна «Дынама», а пасля ў арцы таго дома, дзе была кавярня «Мядуха», — нагадвае Лабадзенка. — Каларытны змрочны гаспадар варыў там каву па-бедуінску на пяску. З дэсертаў быў толькі мядовік».
Але вечным нічога не бывае.
«Днямі я заўважыў на Куфры, што прадаецца мэбля з гэтай кавярні. Той, хто бываў там, адразу пазнае гэтыя зялёныя столікі, на якія Дзед забараняў ставіць ноўтбукі і нават класці тэлефоны. Вырашыў набыць, бо кошт прымальны, а я якраз шукаў нешта такое. Ну, і столікі з гісторыяй», — расказвае Глеб.
«Выявілася, што Дзед (Аляксандр Бажко) год таму памёр. Сын спрабаваў займацца кавярняй далей, але праз пару месяцаў яму не працягнулі арэнду. Мэбля і ўсё начынне ляжала ў гаражы, цяпер вось вырашылі прадаць.
Калі што, там яшчэ шмат чаго ёсць — лавы, зэдлікі, барныя крэслы… А наведвальнікі «Старога Менска» будуць цяпер піць каву за столікамі з гісторыяй», — падсумоўвае вядомы журналіст і культурнік.
Каментары