Мінабароны Расіі заявіла, што «заблакавала і разграміла» дыверсантаў у Белгародскай вобласці
«Падчас контртэрарыстычнай аперацыі ўдарамі авіяцыі, агнём артылерыі і актыўнымі дзеяннямі падраздзяленняў прыкрыцця Дзяржаўнай граніцы Заходняй вайсковай акругі нацыяналістычныя фармаванні былі заблакаваныя і разгромленыя», — гаворыцца ў паведамленні ведамства.
Сцвярджаецца, што па тэрыторыі Украіны, куды адкінулі дыверсантаў, працягвалася нанясенне агнявога паражэння «да поўнай ліквідацыі».
Паводле звестак Мінабароны, забітыя больш за 70 «дыверсантаў». Акрамя таго, знішчаныя чатыры баявыя браняваныя машыны і пяць пікапаў.
Тым часам журналісты расійскага медыя РБК аднавілі ход учорашніх падзей.
Крыніцы РБК у рэгіянальным упраўленні МУС і ў тэрытарыяльным аддзеле паліцыі паведамілі, што атака на Белгародскую вобласць пачалася ў 6:00 22 мая з масіраванага абстрэлу, у якім удзельнічала ў тым ліку танкавае падраздзяленне.
Да 12:00 праўкраінскія сілы, у тым ліку дзесяць адзінак бранятэхнікі, зайшлі ў сяло Козінка.
Расійскія сілавікі пачалі рэагаваць толькі ў 13:30, калі на тэрыторыі прымежных раёнаў Белгародскай вобласці быў уведзены сігнал «Граніца».
У Крамлі заявілі, што пранікненне ўкраінскай ДРГ на тэрыторыю Белгародскай вобласці выклікае глыбокую занепакоенасць і патрабуе вялікіх намаганняў.
Каментары