Крэмль забараніў рэгіёнам публікаваць некралогі загінулым ва Украіне расійскім вайскоўцам
Рэгіёны з найбольшымі стратамі падчас баявых дзеянняў ва Украіне перасталі публікаваць інфармацыю пра смерць вайскоўцаў пасля адпаведнага патрабавання Крамля. Так зрабілі ў Тыве, Бураціі, Валагодскай вобласці, Краснадарскім краі і іншых суб'ектах, піша «Вёрстка» са спасылкай на крыніцы, блізкія да рэгіянальных уладаў.
Пра рашэнне схаваць некралогі таксама расказаў высокапастаўлены прадстаўнік расійскага парламента. «Была асцярога, што [гэта] прывядзе да хваляванняў [у гэтых рэгіёнах]», — растлумачыў адзін з суразмоўцаў.
Таксама, паводле задумы Крамля, адсутнасць некралогаў перашкодзіць журналістам весці незалежныя падлікі колькасці загінулых.
Замест паведамленняў пра гібель жыхароў рэгіёнаў на вайне Крэмль прапанаваў губернатарам публікаваць пазітыўныя навіны: пра дапамогу сем'ям вайскоўцаў і ваенныя поспехі.
«Знайсці такія навіны не так складана: прывёз воз з гуманітаркай ці адкрыў дзіцячы сад для дзяцей мабілізаваных — вось у цябе і пазітыўная навіна», — адзначыла крыніца.
Пры гэтым некаторыя губернатары працягваюць публікаваць паведамленні аб гібелі выхадцаў са сваіх рэгіёнаў. Напрыклад, кіраўнік Сахаліна Васілій Лімарэнка 19 чэрвеня паведаміў пра гібель дваіх сахалінцаў.
Са слоў крыніцы ў парламенце, патрабаванне Крамля тычылася не ўсіх рэгіёнаў. «Ці, дакладней, некаторыя з іх атрымалі строгія інструкцыі — у каго сітуацыя напружаная ці шмат загінулых. Астатнія — не», — адзначыў суразмовец.
Па падліках Рускай службы Бі-бі-сі і «Медиазоны», да цяперашняга моманту пацверджаныя страты Расіі ў вайне супраць Украіны склалі 25,5 тыс. чалавек. Аднак па найбольш кансерватыўных ацэнках Расія магла страціць і 50 тыс. чалавек загінулымі, а беззваротныя страты з улікам тых, хто выбыў са строю па прычыне раненняў, могуць складаць каля 225 тыс. чалавек.
Апошні раз Мінабароны РФ паведамляла пра агульную колькасць страт у верасні 2022 года. Тады ведамства заяўляла пра 5937 загінулых. Пасля гэтага Мінабароны пацвердзіла гібель яшчэ 162 чалавек.
Цяпер чытаюць
Начальнік крымінальнага вышуку МУС бачыў прагулачны дворык СІЗА КДБ з акна свайго кабінета, а потым сам стаў вязнем3
Каментары