Польская армія атрымала першыя танкі Abrams і размесціць іх каля мяжы з Беларуссю
У Польшчу дастаўлены першыя амерыканскія танкі M1A1 Abrams. Цырымонія перадачы 14-ці баявых машын адбылася ў Шчэціне на поўначы Польшчы, у ёй узяў удзел міністр абароны краіны Мар'юш Блашчак.
Фота: Міністэрства абароны Польшчы
Блашчак заявіў, што сёлета Польшча атрымае яшчэ дзве роты танкаў, а ў наступным годзе — цэлы батальён такіх баявых машын.
Танкі пастаўляюцца ў рамках дамовы, падпісанай у студзені гэтага года. Усяго яна тычыцца пастаўкі ўжо ўжываных 116 танкаў M1A1 Abrams разам з машынамі тэхнічнага забеспячэння, каманднымі машынамі і транспарцёрамі.
Танкі паступяць на ўзбраенне 18-й механізаванай дывізіі са штаб-кватэрай у Седльцах недалёка ля мяжы з Беларуссю.
Таксама Польшча чакае пастаўкі з ЗША 250 танкаў Abrams найноўшай версіі M1A2 SEP v. 3.
Каментары