«Чарговая правакацыя з мэтай падарваць рэпутацыю літоўскай дзяржавы». У Літве адрэагавалі на заведзеную ў Беларусі крымінальную справу
Міністарка ўнутраных спраў Літвы Агне Білатайце назвала правакацыяй крымінальную справу, заведзеную беларускай Генеральнай пракуратурай аб злачынстве супраць чалавецтва за жорсткае абыходжанне з мігрантамі на мяжы з Літвой, паведамляе LRT.
Пра завядзенне справы за нібыта жорсткае абыходжанне з мігрантамі на літоўскай мяжы Генпракуратура на чале з Андрэем Шведам заявіла 27 чэрвеня. На наступны дзень міністарка ўнутраных спраў Літвы Агне Білатайце афіцыйна выказалася адносна яе:
«Гэта чарговая правакацыя недэмакратычнага беларускага рэжыму з мэтай зняважыць нашых памежнікаў і падарваць рэпутацыю літоўскай дзяржавы на міжнароднай арэне».
«Мы адзначаем, што Літва выконвае ўсе свае міжнародныя абавязацельствы і паважае свабоды і правы чалавека. Іншаземцам, якія незаконна перасеклі або спрабуюць перасекчы тэрыторыю Літоўскай Рэспублікі, аказваецца ўся неабходная гуманітарная дапамога», — адзначыла яна.
Міністэрства ўнутраных спраў Літвы засведчыла таксама, што Літва распачала міждзяржаўную справу супраць Беларусі праз незаконны ўвоз мігрантаў у Літву. З 3 жніўня 2021 года, калі літоўскія памежнікі атрымалі права разварочваць нелегальных мігрантаў, агулам у Літву не было дапушчана 20,6 тысячы чалавек.
Цяпер чытаюць
Прапаганда рыхтуе грамадства да загадкавай «працяглай камандзіроўкі» Лукашэнкі39
Каментары