Расіяне выкарысталі «Іскандэр», каб ліквідаваць украінскі плацдарм на левым беразе Дняпра
Расійскія войскі нанеслі ўдар па першым пралёце Антонаўскага моста насупраць Херсона балістычнай ракетай «Іскандэр». На першым відэа можна ўбачыць, як ён выглядаў перад ударам, на другім — пасля. На трэцім — сам момант удару.
Такім чынам расійскія войскі спрабуюць ліквідаваць плацдарм, захоплены ўкраінскім спецназам. Пад мостам украінцы хаваліся ад артылерыйскага агню. Па прызнанні расійскіх ваенкараў, усе ранейшыя спробы ўразіць пазіцыі ўкраінцаў ударамі артылерыі і авіяцыі поспеху не мелі, бо расіяне мазалі.
Паводле заяў ваенкараў, плацдарм трымалі ад 50 да 100 украінскіх байцоў пры падтрымцы дронаў і артылерыі з правага берага Дняпра. Расіяне зрабілі прынамсі тры спробы выбіць украінцаў сіламі пяхоты, але кожны раз неслі разгромныя страты, бо ўкраінцы маюць перавагу ў беспілотніках.
З аднаго боку, разбурэнне моста адной ракетай уражвае. Украінцы не маюць ракет такой знішчальнай сілы і, каб у свой час вывесці з ладу гэты мост, мусілі ўжыць дзясяткі «Хаймарсаў».
З другога боку, яно паказвае, што расійскія войскі спрабуюць утрымаць глухую абарону. Вельмі дарагія ракеты «Іскандэр» выкарыстоўваюцца цяпер для вырашэння тактычных, лакальных задач, бо расійская армія няздольная вырашыць іх іншым спосабам.
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым6
Каментары