Структура ААН запярэчыла, што ўкраінскі бізнэсмен Фірташ акрэдытаваны пры іх арганізацыі. Раней казалі, што ён там ад Беларусі
У арганізацыі ААН па прамысловым развіцці (UNIDO) заявілі, што ўкраінскі бізнэсмен Дзмітрый Фірташ не акрэдытаваны пры арганізацыі. Пра гэта піша «Укрінформ» са спасылкай на прэс-сакратара UNIDO Кая Бетке.
«Магу пацвердзіць, што спадар Дзмітрый Фірташ не акрэдытаваны пры UNIDO», — заявіў Бетке.
Раней Deutsche Welle паведамляла, што Дзмітрый Фірташ спрабуе атрымаць дыпламатычны імунітэт праз працу пры UNIDO — адным з малавядомых для шырокай грамадскасці міжнародных агенцтваў у структуры ААН, якое павінна спрыяць індустрыялізацыі посткаланіяльных краін трэцяга свету.
У тэксце рашэння Венскага суда, на якое спасылалася DW, было пазначана, што Фірташ мае статус «дарадцы пастаяннага прадстаўніцтва Рэспублікі Беларусь пры міжнародных арганізацыях у Вене» яшчэ з 2021 года. Якраз на падставе гэтага статусу Фірташ патрабуе спыніць працэдуру сваёй экстрадыцыі ў ЗША, спасылаючыся на дыпламатычны імунітэт.
16 чэрвеня 2023 года паведамлялася, што аўстрыйскі суд вынес рашэнне на карысць Фірташа па справе аб патрабаванні экстрадаваць яго ў ЗША па абвінавачванні ў карупцыі.
Украінскага буйнога бізнэсмена Дзмітрыя Фірташа затрымалі ў Аўстрыі яшчэ ў сакавіку 2014 года па запыце амерыканскіх следчых, але пасля выпусцілі пад заклад у 125 мільёнаў еўра. Фірташу пагражае да 50 гадоў турмы і канфіскацыя ўсіх актываў, калі яго экстрадуюць у ЗША.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку14
Каментары