Анлайн-марафон салідарнасці з палітвязнямі: як паўдзельнічаць і куды пойдуць сродкі

Марафон адбудзецца 29 ліпеня з 10 ранку да 10 вечара па мінскім часе на шматлікіх незалежных ютуб-каналах. Ініцыятыва належыць Вользе Гарбуновай, прадстаўніцы па сацыяльнай палітыцы Аб’яднанага пераходнага кабінета, і яе камандзе. Вольга тлумачыць, што каманда пастаянна вывучае досвед таго, як у іншых краінах працуюць з тэмай палітвязняў, бо гэта не толькі беларуская праблема: «У чэрвені прайшоў анлайн-марафон салідарнасці з палітвязнямі, які рабілі расійскія незалежныя медыя. Мы зразумелі, што яшчэ не спрабавалі такога інструменту».

Падзею падтрымлівае больш за 20 незалежных медыя, сярод якіх «Белсат», «Люстэрка», «Радыё Свабода», «Медыязона», kyky.org і іншыя. У марафоне ўдзельнічае і «Наша Ніва». 

Вольга расказвае пра тое, што можна будзе ўбачыць на марафоне: «Будзе некалькі варшаўскіх студый і адна віленская, 12 гадзін марафону размеркаваныя паміж рознымі медыя. Нехта загадзя рыхтаваў кантэнт, нехта будзе выходзіць у жывы эфір. Пабачым цікавых спікераў: гэта будуць і палітыкі, і блогеры, музыкі, спартоўцы. Асабіста для мяне важна, што будзе шмат людзей з досведам зняволення, будуць сваякі палітвязняў і нават іх дзеці. Упэўненая, што эфір будзе жывы, творчы і цікавы.

Калі адбываецца нешта страшнае, мы аб’ядноўваемся, і, магчыма, гэта той інструмент, які дапаможа нам паказаць палітвязням гэтае яднанне».

Грошы для палітвязняў можна будзе данаціць з 28 ліпеня (пятніца) па 30 ліпеня (нядзеля), збор закрываецца ў 23:59 30 ліпеня. Дапамогу будуць збіраць на адзін рахунак. Каб заданаціць, пераходзьце на сайт salidarnasc.com.

Потым пройдзе першае пасяджэнне назіральнай рады з прадстаўнікоў медыя, што рэалізоўваюць праект. Яны прымуць рашэнне аб тым, як размеркаваць сабраныя сродкі паміж арганізацыямі-ўдзельніцамі марафону, а тыя, у сваю чаргу, змогуць на сабраныя грошы дапамагчы сем’ям палітвязняў, з якімі працуюць. Праз нейкі час (меркавана, праз тры месяцы) назіральная рада вывучыць справаздачы арганізацый і агучыць публічную заяву пра тое, на што пайшлі сродкі.

Вось пра якія арганізацыі гаворка:

• сацыяльны праект INeedHelpBY;
• праект дапамогі палітзняволеным беларускам «Палітвязынка»;
• праваабарончая ініцыятыва дапамогі палітвязням Dissidentby;
• фонд дапамогі беларусам у Літве RAZAM;
• ініцыятыва BY_help;
• Беларуская асацыяцыя палітвязняў «ДА ВОЛІ»;
• Беларуская рада культуры;
• фонд медыцынскай салідарнасці ByMedSol;
• Беларускі фонд спартыўнай салідарнасці;
• фонд беларускай салідарнасці BYSOL;
• дабрачынны фонд «Краіна для жыцця»;
• публічная дабрачынная арганізацыя Littouwin LIONS CLUB;
• Анархічны чорны крыж — Беларусь.

Вольга расказвае:

«Мы звярнуліся з прапановай паўдзельнічаць у марафоне практычна да ўсіх беларускіх праваабарончых арганізацый і ініцыятыў. Прэзентавалі ім ідэю, яны падзяліліся з намі сваімі незакрытымі на гэты момант патрэбамі. Так і склаўся пул гэтых арганізацый. Прааналізуем даныя іх патрэб і тады будзем разумець, у якіх прапорцыях назіральнай радзе варта размеркаваць паміж фондамі сабраныя сродкі, гэтыя прапорцыі будзем ім рэкамендаваць».

Гарбунова дадае, што ўдзельнічаюць і тыя арганізацыі, якія дапамагаюць палітвязням непублічна, а таксама некалькі ініцыятыў, якіх не называюць з прычын бяспекі, бо яны знаходзяцца на тэрыторыі Беларусі.

Вольга спадзяецца, што марафон дазволіць сабраць адчувальную суму грошай, каб дапамагчы ў працы актывістам, фондам і праваабаронцам, а праз іх і тысячам палітзняволеных разам з сем’ямі.

«Эмігравала некалькі соцень тысяч беларусаў. І нават калі 10% ад гэтай колькасці людзей заданаціць грошы, эквівалентныя кубку кавы, атрымаецца адчувальная сума, нават адзін еўра — гэта важна. Таксама мы ведаем, што рэлакавалася вельмі шмат беларускіх кампаній, і часта сустракаю меркаванне, што яны асцерагаюцца афішаваць сваю падтрымку палітвязняў і дэмакратычных сіл. Але падтрымка праз марафон ананімная, мы нікому не дадзім інфармацыі пра тое, хто нам данаціў, і гэта добрая магчымасць заданаціць для тых, хто не хацеў гэта рабіць публічна.

Галоўнае — каб людзі, якія знаходзяцца ў Беларусі, зразумелі, што нам насамрэч не ўсё адно».

Арганізатары падзеі нагадваюць пра меры бяспекі — не варта данаціць з выкарыстаннем расійскіх ці беларускіх плацежных інструментаў. Таксама, калі вы знаходзіцеся ў Беларусі, не рэпосціце, не лайкайце і не каментуйце трансляцыю са сваіх персанальных акаўнтаў.

• 19
• 0
• 1
• 0
• 0
• 0
• 1
• 0