За «здраду дзяржаве» будуць судзіць мужчыну, жанатага з украінкай, якога катавалі пры затрыманні
Палітвязня Яраслава Саковіча ўжо асудзілі па адной крымінальнай справе. Паведамлялася, што супрацоўнікі КДБ катавалі яго, каб выбіць прызнанні, паведамляе «Вясна».
Яраслаў Саковіч раней жыў ва Украіне, аднак вярнуўся ў Беларусь у 2021 годзе праз хворых бацькоў. Вядома, што ён жанаты з украінкай.
Па вяртанні ў Беларусь мужчыну затрымалі супрацоўнікі КДБ. Паведамлялася, што яго катавалі ўсю ноч, каб выбіць прызнанне ў тым, што раней ён ваяваў на баку Украіны. Сілавікі тэлефанавалі ягонай жонцы і абяцалі выслаць ягоную галаву. Пасля гэтага Яраслава адпусцілі, але праз год, 5 жніўня 2022 года, яго зноў затрымалі ў межах крымінальнай справы.
Яго абвінавацілі паводле двух артыкулаў Крымінальнага кодэкса: арт. 295 (Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў), арт. 370 (Здзек з дзяржаўных сімвалаў).
У Мінску 4 мая яго асудзілі да двух гадоў пазбаўлення волі.
Цяпер стала вядома, што ў жніўні Яраслава зноў будуць судзіць. Гэтым разам яго абвінавачваюць паводле арт. 356 Крымінальнага кодэкса (здрада дзяржаве). Паводле следства, ён перадаваў даныя УСУ Украіны. Суд над мужчынам распачнецца 7 жніўня ў Мінскім гарадскім судзе. Справу будзе разглядаць суддзя Анастасія Папко.
Каментары