«Прыстойныя, адважныя, шляхетныя». Хто з замежнікаў заклікаў далучыцца да беларускага марафону салідарнасці
Анлайн-марафон у дапамогу палітвязням «Нам не ўсё адно!» падтрымалі некаторыя замежныя дыпламаты, навукоўцы, дзеячы культуры.
Марафон падтрымала амерыканска-брытанская журналістка і пісьменніца Эн Элізабет Эплбаўм. Яна нарадзілася ў Вашынгтоне, але яе продкі эмігравалі ў ЗША з Беларусі. Напісала кнігу «Паміж Усходам і Захадам», у якой апісвала міграцыйны шлях сваёй сям'і.
За сваю кнігу пра гісторыю ГУЛАГа «Gulag: A History» Эплбаўм атрымала Пулітцэраўскую прэмію.
«Сёння беларуская дэмакратычная грамадзянская супольнасць аб'ядналася ў марафоне па зборы сродкаў для тых, хто знаходзіцца за кратамі. Вы таксама можаце дапамагчы. Праявіце салідарнасць», — напісала журналістка пра беларускі марафон салідарнасці.
Расійскі рэпер Noize MC, які пасля паўнамаштабнай вайны Расіі супраць Украіны пакінуў радзіму, таксама праанансаваў беларускі марафон салідарнасці.
Рэпост зрабіў і расійскі музыка Макс Пакроўскі з гурта «Ногу свело!».
Анонс марафону ў традыцыйным вечаровым стрыме зрабілі юрыст Марк Фейгін і ўкраінскі палітык Аляксей Арастовіч.
«Жыве Беларусь», — сказаў Арастовіч і паказаў знак віктары.
Дацкая журналістка і даследчыца актыўнасці ў выгнанні Катрын Стэўнхой адзначыла, што ў Беларусі з кожным днём павялічваецца колькасць палітвязняў, і падзялілася спасылкай на збор.
«Жыве Беларусь», — дадала яна.
Амерыканскі кінарэжысёр, сцэнарыст і прадзюсар Эрні Барбараш (Ernie Barbarash) таксама праанансаваў беларускі марафон салідарнасці:
«У гэтую суботу, 29 ліпеня, шматлікімі незалежнымі журналісцкімі платформамі праводзіцца дзённы марафон салідарнасці для збору сродкаў для палітвязняў і іх семʼяў. Калі ласка, глядзіце і ахвяруйце».
Эрні Барбараш нарадзіўся ў Адэсе, але ў дзяцінстве сям'я эмігравала ў Канаду. Найбольш ён вядомы баевікамі. У фільмах «Гульні кілераў» і «6 куль» здымаўся Жан-Клод Ван Дам.
Польскі дыпламат Артур Міхальскі падзяліўся ў твітары:
«Нам не ўсё адно!» Прыстойныя, адважныя, шляхетныя… цяпер вязні. Памятай пра іх, іх жонак і мужоў! Падумай пра іх і іх бацькоў! Дапамажы ім і іх дзецям. Твая салідарнасць дасць ім сілы, твая дапамога — надзею. Будзь салідарны — гэта крок да перамогі».
Часовая павераная Літвы ў справах Беларусі Аста Андрыяўскене (Asta Andrijauskienė) напісала:
«Беларусь, нам не ўсё адно! Сёння незалежныя беларускія СМІ, грамадскія арганізацыі і ініцыятывы абʼядналіся ў 12-гадзінным агульнабеларускім інтэрнэт-марафоне салідарнасці «Нам не усё адно!», каб сабраць сродкі для беларускіх палітвязняў і іх семʼяў».
Праваабаронца, палітолаг і кіраўнік літоўскага офіса Freedom House Віціс Юрконіс адзначыў:
«Барацьба ў Беларусі працягваецца. Ніхто не казаў, што будзе лёгка. Больш упэўненасці ў сваёй справе. Суперажыванне і салідарнасць адно з адным. Неабходны супраціў і барацьба з беспакаранасцю. Міжнародная салідарнасць ёсць, толькі працягвайце змагацца за свабоду!»
Ініцыятыву падтрымала гісторык Усходняй Еўропы з Інстытута сучаснай гісторыі ў Мюнхене Юлія Ван Сол.
Анлайн-марафон «Нам не ўсё адно!» праводзілі беларускія незалежныя медыя і праваабарончыя ініцыятывы, каб сабраць грошы для палітвязняў і іх сем’яў. За 12 гадзінаў на марафоне было сабрана 355 тысяч еўра.
Але збор яшчэ не закрыты. Ахвяраваць грошы можна па спасылцы salidarnasc.com да 23:59 гадзін 30 ліпеня.
Каментары